Baghmara, Sept 4,2024: Garoland State Movement Committee (GSMC)-ni dal·gipa tom·bimonganiko re·baenggipa ia jani 20 tariko South Garo Hills a·jani Skotong Baghmara-o ong·atenga, ine GSMC Southern Zone-ni Co-Chairman Luckystone R.Sangma u·iataha.
Ia tom·bimonganiko ong·atani miksongara, A·chik a·song gimikna dingtangmancha jakgittelgipa A·chik a·songko ong·atna GSMC Garoland State-ko dabienga. Uni gimin ia tom·bimonganio pilakan bakko ra·epachina mol·molatenga.
Matgrik Sonaram R.Sangma, A·chik a·songni jakgittelna an·chi pari nikgija skanggipa 1895 bilsio dakgrikdilchengaha. Uandake, 1946 bilsio Matgrik Mody K.Marak, Matgrik Emonsing M.Sangma A·chik a·songni jakgittelna krengdilangaha.
Uni ja·mano, dingtang dingtang gadangni A·chik Matgrikrang jekai Clifford R.Marak, Dilash M.Marak, Purno K.Sangma dakdilangaha.
A·chik a·songna dal·begipa tom·bimonganio, National Federation for New States [NFNS]-ni dilgiparang, dingtang State-na dabigiparang Garoland State-na dabianio chakpaaniko on·na gita re·baenga ine GSMC Southern Zone-ni Co-Chairman parakataha.
Uni gimin, A·chik a·songni Nokmarang aro dingtang dingtang gadango dilgiparang re·baenggipa September 20 tarikni pring 11 bajio Baghmara kal·chakram biapona re·bae bakko ra·etokpachina GSMC Southern Zone-ni dilgiparang mol·molataha.
