Tura, Mar 1, 2026: Shillong aro Tura-ni Grassroot Organisation, gnigipa changna, Sixth Schedule-ni niamrangko Nokma Sanirangna agan ku·pattie on·na gita February 28 tariko Tura-ni Nokma Council, Conference Hall-o program-ko ong·atangaha.

Ia program-ona kamoni neng·take dongenggipa gitcham MCS officer aro Tura ICFAI University-ni Director P.M Sangma mongsonggipa ong·e sokbaaha, unbaksana Resource Person Ukil Disem D.Shira, Nokma Council-ni President Winnison Ch.Marak aro uni ka·rimskarang, A·chik a·songna kamko ka·enggipa Daniel Ingty, Senior Citizen-ni President Grederson C.Momin aro uni ka·rimskarang aro Gasuapara jolni bang·a Nokma Sanirang re·bae bak ra·angaha.

A·chik a·songo tom·tomaniko aro namroro silroroaniko Nokmarangni bilchi ra·bapilna miksonge, Dr Merril N.Sangma, an·tangan gisiko nangbee, Nokmarangni bilko name ripingangkuna, skanggipa chango Dadenggre-ni Nokma Sanirangko okamate skie on·angaha. Uandake gnigipa chango Gasuapara jolni Nokma Sanirangko okamatskae, Nokma Sanirang, maikai an·tangtangni bilko nama bewalo jakkalna man·gen, iani bidingo aro Sixth Schedule-ni niamrangko skie on·angaha.

A·chik Nokmarang an·tangtangni bilko jakkalna changjani a·sel, da·alo so·sojengjeng ong·enga. Uni gimin, ma·gitcham pagitchamrang je niamrangko tarie donangachim, uko apsan daken ja·rikangpilna aro jatni dakbewal rikbewalrangko name ripingangpilna Nokma Sanirangko Dr. Merril Sangma didiangaha.

Nokmarang an·tangtangni bilko jakkalna changja ong·ja changachim, indiba Nokmarangna agan ku·pattidape on·gipa darangba dongjani a·selsa da·alo A·chik jatni niam retirang aro dakbewal rikbewalrang gimaangenga. Uni gimin, ia apsan niamrangko mikkangchi kimkim ong·e ripingangpilna aro maram cha·gimin Nokmarangni gisikko gital ong·pilna Grassroot Organisation, miksonge re·mikkangenga, ine Dr. Sangma, Nokma Sanirangna agan talate on·angaha.

A·chik a·songo bol 1,557 Nokmarang gnang, ia Nokmarang apsan ku·monge an·tangtangni bilko name jakkalgenchimode, A·chik a·song namroro silrorojawama? Uni gimin, Nokmarang sakantian an·tangni bilko maidake jakkalna nangna aro Sixth Schedule-ni niamo pangchake an·tangtangko bil gnange rakkiangchina skie ra·angpachina, Dr. Sangma Nokma Sanirangko didiangaha.

Nokmarangko ganggopna District Council gnang, district council, A·chik jatni niam retirangko ripinggipa niam Rongdik ong·a aro niamrangko tarina man·a. District Council-na Sixth Schedule-ko on·aha. Sixth Schedule-ko on·anichi A·chik a·songko ganggopenga, Sixth Schedule dongjagenchimode, A·chik a·song basakonin gipin jatrangni ning·osa ong·gnokchim. Indiba India sorkari dingtangmancha A·chik a·songna Sixth Schedule-ko on·ahani giminsa, da·alo A·chik a·songko niamchi bera kadule rakkienga. Ian dingtangmancha A·chik jatna Isolni pattigimin ong·a. Uni gimin an·ching sakantian A·chik a·songko name ripingna nangenga ine Dr. Merril Sangma jinmana agan talate on·angaha.

“Chinga mikkangchiba Grassroot Organisation-ni gita program-rangko ong·ate, A·chik a·song gimikni Nokma Sanirangna skie on·na gita kamko ka·anggen” ineba Dr. Sangma agandapangaha.