ghdnews.in@

Dadenggre, Feb 20, 2026::Meghalaya a·doko skia porani gadangko tang·doatna gita sorkari rakbee kamrangko ka·engoba, Govt. skulo skie on·enggipa Officiating Assistant Lecturer-rang (Under 3F) an·tangtangni man·gni dormaharangko re·anggipa, 2025 bilsini October jaoni 2026 bilsini February jaona kingkingba, man·tokkujaenga ine skigiparang suk ong·gijaniko parakataha.

Officiating Assistant. Lecturer ba dakchake on·gipa skigiparangni parakatani gitade, uamang an·tangtangni man·gni dormaharangko on·china batanggimin somoio DSEL Office Shillong-ona changni chang re·angahachim, indiba Office-o kam ka·giparang chutti ra·a ine pa·sike, da·alonaba ia apsan kattakon agane dongkuenga ine parakataha.

Ge·sa Director Office-o namedake kamrangko ka·gijaniara sorkari aro Director-ni name nirokjani a·sel ong·enga, ineba janapataha.

Indake skigiparangko dormaha gri kam ka·ate, high quality education ba a·doko namgipa skia poraianiko man·na ka·donganirang, skigiparangko kal·steke roa gita chacha ong·enga. Maina bang·a skigiparangan nokdang ba·ku dakgiminrang ong·e, an·tangtangni dedrangni okriako ok gapatna namen neng·nikaniko man·tokenga aro da·o gita skulrango admission a·bachenge, lekka ki·tap, skul uniform-rangko brena namen neng·nikaniko man·tokengaha ine parakataha.

Uni gimin a·doko namgipa skia porako man·na rakbee kamrangko ka·engan baksana, skie on·enggiparangni man·gni dormaharangko ta·raken somoi gita on·china aro office-o kam ka·enggiparangni tik ong·gija nangana bate, chutti ra·e kam ka·enggipa manderangko niroke namdapatanirangko dakchina sorkari aro director-ko mol·molataha.