Tura, Sep 24, 2025: Garo Hills Autonomous District Council (GHADC)-o pass ka·e watatgipa, Codification of Garo Customary Law (GCL), Bill 2024-ko nipiltaichina Meghalaya a·dokni Governor, September 15 tariko GHADC-ona watatpilahani gimin, GHADC-ni Deputy Chief Executive Member (Dy CEM) Nikman Ch Marak, Monggolbar salo pilak MDC-rang, dingtang dingtang NGO-rang, Civil Society Organisation-rang aro Senior Citizen-rangko okamate, Tura Circuit House-o tom·e chanchirimangaha.

Nikman Marak-ni kobor ra·timgiparangna aganani gitade, ia GCL Bill-ko Supreme Court-ni dongimin niamrango pangchake taripilchina a·dokni Governor watatpilahani gimin da·o ia Bill-ko nipiltaina dongimin GCL-ni Committee, MDC-rang, dingtang dingtang NGO-rang, Civil Society Organisation-rang aro Senior Citizen-rangni agan-ku·pattianirangko ra·e taridaptaina miksongenga.

“Ia GCL Bill-ni adita bakrangko nipiltaina gita a·dokni Governor, GHADC-ona watatpilaha aro da·o ia Bill-ko dongimin GCL Committee, re·baenggipa October 13 tarikona dingtang dingtang NGO-rangni, Senior Citizen-rangni agan-ku·pattianirangko ra·e taridapenba, Governor-ona watattaigen” ine Marak aganaha.

Deputy CEM-ni parakatani gitade, Monggolbar salo ia GCL-ko tarina dongimin Committee, GHADC-ni MDC-rang aro Garo Hills-ni dingtang dingtang NGO-rang aro Senior Citizen-rang baksa tom·e, ia GCL Bill-ko taridapna nangenga aro October 13 tarik ba una skang, an·tangtangni ku·pattianirangko on·china didiataha.

“Dingtang dingtang NGO-rangni agan-ku·pattianirango pangchake October 13 tariko GCL Committee, ia GCL Bill-ko nipiltaigen. Ua somoio taridapna nanganirangko Committee taridapgen aro taridapna nanggijarangkode apsan daken Governor-na watatpilgen” ine Marak aganaha.

Ia GCL Bill, 2024-ko Governor-ni watatpiltaiahani gimin Association of Democracy & Empowerment (ADE)-ni President Dalseng Bira Ch Momin, an·tangni suk ong·gijaniko parakatenba, “Ia Bill-ni chapter 1-o seani gitade, ‘gipin jat ma·gipa ba pagipaoni atchigipa dedrangrang, A·chik ma·gipa ba pagipani ma·chongko ra·genchimoba, uade A·chik ong·na man·jawa’ ingipa kattarangkon changni chang jegale watatpilenganiara ra·chakna man·gijani ong·enga” ine aganenba, Skanggipa A·chikrangni daka rikanirangko a·songni niam bidiko see rakkichina didiangaha.

“Chingna antigittam somoiko on·ani gisepon, chinga Governor-ni watatpilgipa GCL Bill-ko che·em che·em poraitaie, Committee-na nanga gita ku·pattianirangko on·anggen” ine Momin aganaha.

Apsan daken Garo Students Union (GSU)-ni President Zikku Balgra Marak-ba ia GCL Bill-ko Governor watpilattaiahani gimin, suk ong·gijaniko parakatenba, iade A·chikrangni daka rikani niamrangsa ong·ani gimin Governor-de gipin jat ong·ani gimin name ma·sijawa aro A·chikrangni niam retirangko ma·sigipa a·dok sorkarini dilgiparangsa watatpilahakon ine chanchichipaniko parakataha.

Re·baenggipa October 13 tarikni gisepo uamang ia GCL Bill-ko nipiltaienba, nanga gita ku·pattianirangko on·anggen ineba GSU President aganaha.