Tura, March 11, 2026: Re·baenggipa Garo Hills Autonomous District Council (GHADC) eleksino, A·chik ong·gijagipa, non-tribal candidate-rang susana man·jawa aro nomination file ka·ani somoio ST Certificate-ko mesokna nangtelgen, ine GHADC-ni Executive Committee-ni pass ka·giminko manigija drae Nomination File ka·na re·bagipa, Phulbari-ni gitcham MLA Estamatur SG Mominin-ko nomination file ka·ani skanggipa salo A·chik a·songni manderang nomination file ka·na on·gija, DC office-oniko rikgalatpilaha.

Indian Constitution-ni Article 244 (2)-o on·gimin Sixth Schedule-ni niamko pe·drae Estamatur Mominin, A·chikrangko ra·bie, nomination file ka·na re·badraani a·sel Garo Hills-o so·sojengjeng ong·enga. ST Certificate-ko ra·gatna skangonin, Garo Hills-ni NGO-rang GHADC eleksino gipin jatrang chong·motan Muslimrang susana bak ra·na man·jawa ine dabienba, jegalaniko dakengachim. Uni gisepon manigija A·chik jatko chonnike, Estamatur Mominin, Sofior Rahman aro Rajabala-ni MLA Dr.Mizanur Khazi Rahman, GHADC-o Executive Committee-ni ra·gatgimin, ST Certificate-ko den·galpilchina aro ra·chakjachina a·dokni Governor-na sedoatan baksa High Court-o Public Litigation Interest (PIL)-ko ka·doangskaha.

Indake Tribal jatrangna on·gimin Sixth Schedule-ni niamko pe·e, Muslimrang A·chikrangni kosako re·draani a·sel, Garo Hills-o so·sojengjeng ong·anirang batririkenga.GHADC eleksin ong·na skangonin, gipin jatrangko GHADC eleksino bak ra·na ba susana man·jawa ine jegalsoaniko dakenba, March 9 tarikonin Garo Hills-ni dingtang dingtang NGO-rang, Nokmarang, Ma·gipa dolrang unikoa A·chik a·songni manderang, Tura DC office mikkango jinma tom·dake, nomination file ka·na re·bagipa gipin jatrangko champengsoengon, manigija nomination file ka·na re·badragipa Estamur Mominin-ko rikgalatpilaha.

Indake, A·chik a·songni manderang Tura DC office mikkango jinma tom·dake, nomination file ka·na re·bagipa gipin jatrangko March 9 tarikoni March 16 tarikona champengsoaniko dakengon, manigija nomination file ka·na re·bagipa Phulbari-ni gitcham MLA Estamatur Mominin-ko nomination file ka·na on·gija watpilatani a·sel, Muslimrang, West Garo Hills a·jani a·kawe jolo donggipa Chibinang antink A·chik dokkanrangko aro GSU Office-ko wa·al so·e galaha.

Re·anggipa January 9 tariko Dilseng M.Sangma-ko gipin jatrang so·otani ja·mano so·sojengjeng ong·aniko namatpilna gita West Garo Hills a·jani District Administration, Pulis department, Civil Society Organisation-rang aro Toromko dilgiparang baksa apsan tom·e, chanchirimaniko dakenba, tom·tomaniko man·ahachim. Indiba GHADC eleksino susana gita gipin jatrangni manigija nomination file ka·drana jotton ka·ani a·sel da·alo so·sojengjeng ong·anirangko a·bachengtaiaha.

Indake Garo Hills-o so·sojengjeng ong·aniko namatna ba tom·tomaniko ra·bapilna, District Administration, March 10 tarik wal 12 bajioni 11 tarik wal 12 bajiona Curfew-ko ra·gatani ja·mano March 11 tarik wal 12 bajioni 13 tarik wal 12 bajiona ra·dodapataha.