Songsak, Jan 20, 2026: East Garo Hills a·jani Songsak Block-ni ning·o donggipa Koksi Songma-oniko Premons Promoters Private Limited (PPPL)-ni niamgri ro·ong bikotanichi samtangtango donggipa biaprangko nosto ong·atenga ine songdongenggipa manderangni palo Garo Hills Youth Solidarity (GHYS), Meghalaya State Pollution Control Board (MSPCB),Forest & Environment Department-na badi ka·doangaha.

GHYS-ni parakatani gitade, Premons Promoters Private Limited company ro·ong bikotengon, Geology Department-oni maming ge·etani gri niamgri ro·ong jetgipa kolrangko jakkalenga ine ma·sina man·aha.

PPPL-ni niamgri ro·ong bikotenggipa biapara Chidrang chibimani sambao ong·a aro ua chibimako song dam 10-ni manderang chi ringna, auna aro gipin dingtang dingtang kamrangna jakkalengachim. Unbaksana ua chibimaonikon Jal Jeevan Mission (JJM)-ni ning·o songni manderangna chiko ra·ange ba salange on·enga. Indiba ua biaponikon niamgri ro·ong bikotengani a·sel, ua chibimani chi ringna aro auna namgija, a·dubekrara dake nosto ong·enga. Ua chibimako salantian dingtang dingtang kamrangna aro chi ringna jakkalanio songni manderang namen neng·nikaniko man·enga ine GHYS parakaha.

Unbaksana Koksi Songma-oni Nangapa-ona PMGSY rama tarigipa gita dal·a dal·a jrimgipa garirang ro·ong salruraanichi ramarang nosto ong·engani gimin songni manderang raken jegalataha. Ua ramako tarina gita songni manderang rakbee kamrangko ka·ani a·sesa ua ramako man·aha ine GHYS-ni President Endick Marak parakataha.

Ua rama gita jrimgipa garirang salanti ro·ong salrurae nosto ong·atengani gimin Koksi Songma-oniko niamgri ro·ong bikotaniko aro jrimgipa garirangni re·ruraaniko ta·rake dontongatchina GHYS, Meghalaya State Pollution Control Board, Forest & Environment Department-ko didiataha.