Shillong, March 26, 2026: Garo Hills Autonomous District Council (GHADC) election-o susagipa candidate-rangna Scheduled Tribe (ST) Certificate-ko nangtelgipa ong·atna pass ka·gipa niamko Monggolbar salo, a·dokni Governor CH Vijayashankar ra·chakani ja·man, GHADC-na dingtang Electoral Roll-ko tarigen ine a·dok sorkari ku·rachakaha.

Iani bidingo kobor ra·timgiparangna talatengon, GHADC-o Tribal ong·gijagipa manderangni bak ra·aniko champengna niamko tariahani gimin, Khasi Hills Autonomous District Council (KHADC) aro Jaintia Hills Autonomous District Council (JHADC)-oba an·tangtangni niamrangko tarichina sorkari seachi u·iatgen ine a·dokni Dakchakgipa Skotong Minister aro District Council Affairs (DCA)-ni Minister Prestone Tynsong parakataha.

Tynsong-ni parakatani gitade, GHADC election-o susagiparangna ST Certificate-ko nangtelgipa ong·atna taridapgimin niamko a·dokni Governor ra·chakahaoba, GHADC-ni term-ko jadokna ra·dodapanikode sorkari ra·pilkujawa.

“Sixth Schedule-ni Rule 8-ko GHADC-o taridape pass ka·aniko ra·chakahani gimin chinga, a·dokni Governor-ko mittelna sika. Ia Bill-ko Governor ra·chakahani gimin da·o ian Act ba niam ong·aha,” ine Tynsong aganaha.

GHADC election-o Tribal ong·gijagipa manderangni bak ra·aniko champengahani gimin, da·ode Electoral Roll-rangko a·dok sorkari gital dake nipilanggnok ineba DCA-ni Minister ku·rachakaha.

“GHADC-o gital niamko ra·gatahani gimin, Electoral Roll-rangkoba nipiltaina ga·akengaha. Budbar salo anga department baksa tom·e chanchirimtaigen aro nangani kri GHADC-na ge·etanirangko on·anggen,” ine Tynsong parakataha.

KHADC aro JHADC-ode Electoral Roll-rango Tribal-rangkosan segataiani gimin, GHADC-nasan dingtang Electoral Roll-ko taritaina nangaignok, ine DCA Minister parakataha.

“GHADC-o gital niamko ra·gatahani gimin KHADC aro JHADC-o ja·rikgipa apsan niamkon GHADC-oba ja·rikna nanggnok,” ine ua aganaha.

KHADC aro JHADC-oba an·tangtangna niamrangko tarichina sorkari u·iatgen. “AD Rules-ni Clause 8-ko taridape, Governor-na watatchina chinga KHADC aro JHADC-na sedoatgen,” ine Tynsong aganaha.

Garo Hills-o so·sojengjeng ong·anina GHADC election-ko ra·doatna nangahaoba, da·o tom·tomanirangko man·piltaiengaha ine Deputy Skotong Minister parakataha.

“GHADC-o AD Rules-ko taridapahani gimin, da·o Garo Hills-ni manderang kusi ong·aha aro da·o tom·tomaniko man·pilengaha” ineba Tynsong aganaha.