Tura, April 25,2024: A·chik a·songna chong·motan Garo Hills Autonomous District Council (GHADC)-na dingtang electoral roll-ko tarichina aro Garo Customary Law (GCL), Financial Rules, Service Rules-ko ta·rake ra·gatchina aro Public Account Committee (PAC)-ko songe on·china dabie, Bristibar salo, Garo Hills-ni dingtang dingtang NGO-rang, jekai ADE, FKJGP, GSU, FAF, AYWO, FKJGP TGCSU, FKJGP TGC Cell aro NGCO GHADC-ni office mikkango jinma asonge jingjengatangaha. Apsandaken Sukrobar saloba chong·motan April 25 tarikoba jingjengatangkugen ine NGO-rang parakataha.

A·chikrangni ra·gatna nangchongmotenggipa niamara Codification of Garo Customary Law (GCL)-ko GHADC-ni Executive Committee (EC)-rang aro Opposition MDC-rang apsan ku·monge ja·ku de·enba, GCL-o Governor-ni soiko ra·na changni chang Governor-ona watataha, indiba watonatpilronga. Iara maini a·sel ong·enga iani bidingo a·dok sorkari ta·rake nirokataniko dakenba, chu·sokatchina NGO-rang a·dok sorkariko aro District Council Affairs Minister-ko mol·molataha. Ia GCL-ko batanggipa 2005 bilsioni ra·gatna ja·ku de·enga, indiba da·alona kingking be·en pilna man·kuja. Iako ra·gatna sikteljae, dakengma, ma ma·sieba ma·sija dakengama, gisiko dukba ong·a aro ka·a chakna amja ine Dalseng Bira Ch.Momin aganaha. A·chikrangni nangchongmotgipa Niam-Reti-rangko ra·gatna man·jani a·sel, A·chingrango pangchakani mamingba dongkuja. Uni giminsa ia GCL-ko ra·gatna nangchongmotenga ine Momin agandapataha.

GHADC-o dingtang electoral roll-ko tarichina aro Garo Customary Law-ko ta·rake ra·gatchina dabiangan baksana GHADC-o kam ka·enggipa manderangna Service Rule-ko tarie on·china aro GHADC-o kam ka·enggiparangna bilsigittam batpile, dormaharangko on·na man·jaengani a·selara Finance Rule dongjani gimin tangka paisarangko jakkalani hisap dongja aro GHADC-ni tangkarang bachi gimaenga aro mai ong·enga, Finance Rule dongjani a·sel sera bera ong·enga. Uni gimin GHADC·o tangka paisarangko nambate jakkalna man·na gita Finance Rule-ko ra·gatna nangenga. ine NGO-rang dabiangtokaha.

GHADC-o dingtang Electoral Roll-ko tarikujani a·sel, gipin jatrang skatang GHADC election-o MDC chakatna aro vote pu·onna man·enga. Ia GHADC-ara dingtangmancha A·chikrangna on·gimin Sixth Schedule ong·a, uni gimin gipin jatrang GHADC election-o susana aro vote on·na niam dongja ine NGO-rang a·kangataha. GHADC-o Service Rule dongjani a·selan GHADC-o kam ka·giparang nangana bate skatang political appointee-rangko ka·jok. Uni gimin, niam gita kam ka·na changgipa manderangko basena man·na gita gita ia Service Rule-ko ra·gatna nangenga ine Pritam Arengh aganangaha.

GHADC-ni kamrango parak ong·anirang dongchina aro manderang ka·dongchakna man·na gita Public Accounts Committee (PAC)-ko songchina gitaba ia NGO-rang dabiangaha.

Ia dabianirangko chu·sokatja ong·ode, mikkangchi chanchie ja·kurangko de·anggen aro ia dabianirangara NGO-rangnisan ong·ja, A·chik jat gimikni dabiani aro ku·rang on·ani ong·a ine NGO-rang parakataha.