Tura, March 5, 2026: Re·baenggipa April 10 tariko ong·atenghipa Garo Hills Autonomous District Council (GHADC) election-o susana gita candidate-rang, Scheduled Tribe (ST) Certificate-ko nangtelgen ine adita salrangna skang, Executive Committee (EC)-ni pass ka·aniko sakbri ruling MDC-rang aro a·dok sorkari ra·galpilna jotton ka·genchimode, Garo Hills-o A·chik jat gimik bilakbee jingjengatgen, ine Sombar salo, Garo Hills-ni dingtang dingtang MGO-rang, mikrakataniko on·angaha.

GHADC election-o susana gita candidate-rang ST certificate dongna nangtelgen, ine EC-ni pass ka·a ja·man, sakbri ruling MDC-rang, GHADC-ni Chief Executive Membor (CEM), Deputy CEM aro Secretary-ona re·ange jegalaniko dakenba, ka·mikkenatanirangko knasoe, Sombar salo, Garo Hills-ni doldok NGO-rang, jekai FKJGP, ADE, AYWO, GSU, FAF aro AHAM, GHADC office-ona re·ange, mikrakataniko on·angaha.

NGO dilgiparangni, kobor ra·timgiparangna talatangengon, batanggimin 2015 bilsirangonin, GHADC-o gipin jatrang susana aro bak ra·na man·jawa ine dakgrikbaenga, uandake ia bilsioba apsandake jegalenba, jingjengataniko dakna gita tik ka·manahachim. Indiba GHADC-ni CEM ka·dongbee gipin jatrang susana man·jana gita, nomination file ka·ani somoio ST certificate-ko nangchongmotgipa dake donatahani gimin NGO-rang jingjengataniko dontongatchengaha, ine aganaha.

“Chinga ru·uta bilsirangonin, GHADC election-o gipin jatrang susana aro vote pu·ona man·jawa, ine dabibaenga. Uni gisepon da·alo CEM Albinush R.Marak, ST Certificate-ko mandatory dake nomination file ka·anio donataha, chinga namen kusi ong·bejok, maina iaba mingsa nangchongmotgipa ja·ku de·ani ong·a. Indiba A·chik jatni namgnina ra·gatgipa niamko jegale, ia niamko ra·galpilchina dabigipa sakbri MDC-rangna chinga raken mikkrakataniko on·atenga. Uni gisepon, manigija dakdraa ong·ode, chinga nie dongjawa aro A·cjik jat gimik chakatgen” ine FKJGP Garo Hills Zone-ni President Pritam Arengh parakataha.

GHADC election-o susaenggipa candidate-rang ST Certificate dongna nangtelgen, je candidate-rangan ST Certificate dongja, uamang election-o susana man·jawa ingipa ge·etaniko chong·motan order-ko on·aha.

“GHADC election-o susana gita ST certificate-ko nangtelgnok ine EC-ni pass ka·ani ja·man, ruling MDC sakbri, GHADC-ni CEM aro official-rangko grongenba, ia order-ko ra·galpilchina dabiaha ine chinga knasoaha. Uni gimin da·alo chinga GHADC office-ona re·bae, iani bidingo dingtangmancha mikrakataniko on·enga. Ia gital ra·gatgipa niamko ruling ba opposition MDC-rangoni jegalna jotton ka·genchimode ba a·dok sorkarioniba ia niamko ra·galpilna jotton ka·genchimode, Garo Hills gimikon chinga bilakbee jingjengatanirangko dakanggen,” ine ADE-ni president Dalseng Bira Ch Momin mikrakataniko on·angaha.

GHADC election-o gipin jatrang susana man·ja baksana GHADC-na dingtang electoral roll-ko tarichina, Garo Customary Law-ko pass ka·china, Service Rule Finance Rule-ko ra·gatchina aro Finance Account Committee-ko songchina aro District Council Office-ni pilak kamrangkon Digitalise ka·china gita NGO-rang chinga skangonin dabienga ine Momin parakataha.