Tura, Sep 22, 2025: Garo Hills Autonomous District Council (GHADC)-o ong·enggipa obostarangko namatna gita sorkarini songe on·gipa Reforms Sub-Committee, Sombar salo Non-Gazetted Employees Association (NGEA)-ni dilgiparang baksa Tura Circuit House-o tom·e chanchirimangaha.

Ia tom·anio, West Garo Hills a·jani Deputy Commissioner Vibhor Aggarwal baksa Sub Committee-ni member-rang, chong·motan, Tura Don Bosco College-ni Principal Fr Januarius S Sangma, Hawakhana Baptist Mondolini Pamong Rev Frithing D Sangma, gitcham MCS officer Charming N Sangma, Tura Municipal Board-ni Chief Executive Officer (CEO) Jude Rangku T Sangma, NGEA-ni President Brithen M Sangma, Timtim N Sangma aro gipin dilgiparang dongpae bak ra·angaha.

Indake tom·anio dolgni chanchirimengon, GHADC-ko chalaianio tangka paisana neng·nikanirangko chagrongna nangengani gimin sorkarini dakchake on·na miksongengani bidingo Sub Committee, NGEA-ni dilgiparangna agan-talatanirangko on·angaha.

Uandake tom·a matchotani ja·mano kobor ra·timgiparangna agangengon, uamang ru·uta bilsirangonin GHADC-o tangka paisarang kim·kim ong·aniko nangnikengani gimin, sorkarini dakchakaniko ra·na kusi ong·aia, indiba District Council-na on·gimin jakgitelgipa bilrangko gimaatnasa kenchakna nangenga ine NGEA-ni President Brithen M Sangma aganaha.

Indake ong·genchimoba, iani bidingo uamang NGEA-ni pilak member-rang baksa chanchirimesa jekoba dakgen, da·alo anga dilgipa ong·oba saksande ku·rachakna man·jawa. Maina chingni janggilo hajal batgipa employee-rang gnang ine Brithen Sangma aganaha.

West Garo Hills a·jani Deputy Commissioner Vibhor Aggarwal-ba kobor ra·timgiparangna agangengon, ia tom·anio je nangnikanirangkon NGEA-ni dilgiparang janapaha, ia pilakkon a·dok sorkariona watatgen ine ku·rachakangaha. Ia tom·anio chanchirimaniko aro agan ku·pattianirangko Sub Committee, report-ko tarie sorkarina watatgen ineba DC aganaha.