Tura, Sept 2, 2024: GHADC-o kam ka·giparang, Non Gazetted Employees Association [NGEA]-ni dilachi re·anggipa August 19 tarikoni sal 9-na jingjengataniko dakanio uamangni dabianiko chu·sokatna man·jahani gimin, September 2 tarik Sombar salo tom·e chanchirimaniko dakenba, jena miksonge dabiengachim, uko chu·sokatkuja dipetna jingjengataniko dontongjawa ine parakenba, rakbate ja·ku de·angkuna jinma tik ka·angaha.

Re·anggipa Sonibar salo West Garo Hills-ni Deputy Commissioner, NGEA-ni adita sak dilgiparangko okamate, GHADC-ni CEM, Deputy CEM aro EM-rang baksa Tura Circuit House-o tom·aniko ong·ate, chanchirimaniko dakanio ra·chakna man·gijani ong·aha ine NGEA-ni President Brithen M.Sangma jinmana parakataha.

Indake, Sonibar salo West Garo Hills-ni DC aro GHADC-ni EM-rang baksa tom·e chanchirimanio je kattarangko chanchirimahachim, uani bidingo, Brithen Sangma-ni jinmana parakatani gitade, GHADC-ni CEM aro gipin EM-rang jingjengataniko dontonge, gitcham fourth pay-o on·enggipa jagittamni dormahako ra·chake, kamtangtangko ka·pilchina didiangaha.

GHADC-ni CEM Albinush R.Marak-ni NGEA-ni dilgiparangna aganatani gitade, na·simangna Fifth Pay-ko on·na gita tangka paisarang chu·ongjaenga aro bang·en kamrangko ka·na nangkuenga. Ua kamrangko matchotani ja·man re·baenggipa, 2025 bilsini January ja dipet, na·simangna fifth pay-ko on·chongmotgen, uni gimin, ia bilsi mangmangko sengkubo aro jagittamni dormahako ra·chengbo ine aganaha. Unbaksana DC-ba re·baenggipa 2025 bilsini Calender Year matchote, April jaoni na·simangna fifth pay-ko on·gen ine aganaha.

Indiba GHADC-o kam ka·giparang, a·bachengonin fifth pay-ko on·china dabie jingjengatahani gimin, fourth pay-ko ra·chakna man·jawa. Uni gimin chinga jinma baksa Sombar-o tom·e chanchirimgen ine somoiko ra·aha. Uni gisepon, GHADC-o kam ka·giparang fourth pay-ko ra·chakna man·jawa, chingna fifth pay-kosa nanga. Jena kingking fifth pay-ko on·ja, jingjengataniko dontongjawa, “Chingna fifth pay-kosa nanga, gitcham fourth pay scale-ko nangja” ine parakatenba, fifth pay-ko on·kuja dipetna jingjengataniko dakangkuna jinma tik ka·angaha.

Unbaksana, Sombar salo Council Level Review Committee [CLRC], NGEA-ni dilgiparangko okamate, GHADC-ni Secretary Office-o chanchirimaniko dakenba, jingjengataniko dontongchina didiangaha. Indiba GHADC-o kam ka·giparang gitcham fourth pay scale-o on·enggipa jagittamni dormahako ra·jawa, ine jegalatenba, a·bachengaonin fifth pay-ko on·chinasa dabiengahani gimin, GHADC-o kam ka·giparang darangba gitcham fourth pay scale-ko ra·na jechaktokaha.

“Chinga fourth pay-ko ra·jawa, chingna fifth pay-kosa nanga” ine jinma dabiangtokaha.

“Chingna fifth pay dormahako on·ja dipet, chinga jingjengataniko dontongja” ine jinma parakattokaha.

“Chinga re·anggipa 2021 bilsioni GHADC-ko chalaienggipa EC-rangna somoiko on·aha, indiba da·o fifth pay-ko on·na gita kamrang bang·en dongkuenga, ine aganaiara bebe ra·na man·gijani ong·a. GHADC-o kam ka·giparangna fifth pay dormahako on·china 2018 bilsion a·dokni Governor ge·etaniko on·manaha aro fifth pay-ko on·na gita GHADC-o ra·chakaha, uni gisepon, kam ka·na nangkuenga ine agananiara ra·chakna aro bebe ra·na amgijani ong·a” ine GHADC-o kam ka·giparang jparakataha.