Tura, Sept 27, 2025: Garo Hills Autonomous District Council (GHADC)-o kam ka·enggiparang ja 44-ni dormaharangko man·kujaengani gimin re·anggipa July 7 tarikoni September 26 tarikona kamrangko ka·gija jingjengataniko dakenba, jagni batpile GHADC office-ko chipe donanichi Garo Hills-o songdongenggipa manderang pilak nanga kamrangko ka·na, lekkarangko tarina, kajinarangko gamna man·jae, neng·nikanirangko man·engahani gimin, jingjengataniko dikdiksana dontongatchengenba, re·baenggipa October 6 tarikoni kamrangko ka·pilgnok ine Non Gazetted Employees Association (NGEA)-ni President Brithen M. Sangma parakataha.

Indake jingjengataniko dikdiksa dontongatchenganiara, Garo Hills-ni manderang dingtang dingtang nanggipa lekkarangko tarina man·jae neng·nikanirangko man·tokengani gimin, September 26 tariko NGEA-ni dilgiparang aro ja·rikgiparang apsan ku·monge chanchirimaniko dakenba, A·chik a·songo songdongenggipa manderangni namgnina chanchie dikdiksana dontongatchengaha.

Unbaksana jingjengataniko dikdiksa dongtongatengon, office-ni pilak nanga kamrangko re∙bae ka·etokchina NGEA-ni President kam ka·rimskarangko didiataha.

Uni gisepon kam ka·giparangko GHADC-ni authority-rang kam suspend ka·ode ba kam bon·atode ba show cause notice on·genchimode, bakan jingjengataniko a·bachengatpiltaigen ine NGEA-ni President parakataha.

Jagni batpile jingjengatani ja·mano, Executive Committee (EC), kam ka∙giparangna ja 12-ni dormahako on∙na ku∙chakahani gimin bang·bata kam ka·giparangan ja 12-ni dormahako ra·na nangniktokaha ine parakatenngon, ia ja 12-ni dormahako on·na gita EC order-ko on∙manahani gimin, ja 44-ni dormaharangko dabigenchimoba, ja 12-ni dormahakon ra·chakna ga·akaiaha. Indiba ia ja 12-ni dormahako mai system-o on·gen uko namedake ma·sikuja, ine sakgipin NGEA-ni dilgipa Timtim N.Sangma aganaha.

Indake ong·engon, re·baenggipa November 1 tarikoni jaanti dormaha on·na miksonganikode, mai system-o on·gen, aro banoni tangkako maidake on·gen, rongtale see jote on·a dongkujani gimin, ra·chakna jajaani ong·enga. Unbaksana NGO-rangba iani bidingo maidake, banoni tangkako jaanti on·gen, ine Skotong Minister-o sing·aniko dakengon, rongtale talatanirang dongkujani gimin, ra·chakna kenani ong·enga aro NGEA mangmangsan iako ra·na jechakenga ong·ja, NGO-rangba iani bidingo talataniko nangnikenga ineba Timtim Sangma aganaha.