Tura, Sept 24, 2035:Garo Hills Autonomous District Council (GHADC)-o kam ka·giparang ja 44-ni dormaharangko man·kujaengani gimin kamrangko ka·gija jagittam ong·na sipile jingjengatengon, kam ka·giparangna bilsisani dormahako on·na gita Executive Committee (EC) ku·rachakaha.

Indake ong·genchimoba, Non Gazetted Employees’ Association (NGEA), Butbar salo jinma tom·e chanchirimaniko dakenba, Executive Committee-ni da·o on·na tik ka·enggipa bilsisani dormahako ra·jawa ine jinma tik ka·angaha. Uamangna chu·gimik ja 44-ni dormahako changsano on·china dabiangkuaha aro ja 44-ni dormaharangko on·kuja dipetna jingjengataniko dontongkujawa ine parakataha.

GHADC-o kam ka·giparangna, ja 12-ni dormahako on·chenge, bangki dormaharangko bilsignini gisepo changgittam dake on·skagen aro re·baenggipa November 1 tarikoni jaanti dormahako on·gen, ine a·dok sorkarini tik ka·aniko GHADC-ni Executive Committee, Butbar salo parakatahachim. Indiba Executive Committee-ni dormaha on·na tik ka·aniko kam ka·giparang pilakan ra·na jechaktokaha.

Re·anggipa Sombar salo a·dok sorkarini songe on·gipa, GHADC Reforms Sub Committee-ni member-rang NGEA-ni dilgiparangko okame, GHADC-o ong·enggipa obostarangko namatna gita chanchirimaha aro bilsisani dormahako ra·china kam ka·giparangko didiangaha.

Indake ong·genchimoba, GHADC-o kam ka·giparang, Executive Committee-ni dormaha on·na ku·rachakaniko bebe ra·na amjaha. Maina batanggipa salrangon bang·a, apsan dakgipa ku·rachakanirangko on·genchimoba, pangnan chu·sokatrongja. Uni gimin da·alode, tangka sokbaako mesoke, iakai ja 44-ni dormaharangko on·gnok ine written issurance-ko on·ahaosa bebe ra·na man·aignok, ku·siktingchi aganakode, bebe ra·na man·jawaha, ine NGEA-ni President Brithen M.Sangma parakataha.

“Chingni kamrangko dontonge jingjengatengani gimin, skanggipao ja 4-niko gnigipao ja 5-niko gittamgipao ja 10-niko brigipao ja 12-niko on·na ku·rachakenga. Iarang baditana kakket ukoba ma·sija, pangnan dormaha on·na ku·rachakade bang·jok, indiba kamde chu·sokrongja bangbango balponge bon·angaia. Da·oba kusi ong·mikata dake, jingjengataniko dontongchinasa ropenga. Bisongni ropana chinga jngjengataniko dontongahaode, jagni jagittam sengoba, apsan ong·pilaigen. Uni gimin, chingna changsano ja 44-ni dormahako on·gnok ine tangka paisani cheque-ko mesokan baksa written issurance-ko on·ahaosa, jingjengatanikode dontongna man·aignok, balabalari ku·sikchi aganaiode, ra·chakna man·chongmotjawaha”, ine NGEA-ni President parakataha.

“Da·alo ja 12-ni dormahako on·na ku·rachakahani gimin, chinga jinma tom·e chanchirimon, gimikan ja 12-ni dormahako ra·na jechaktokaha, ja 44-ni dormahakosa on·china dabitokengani gimin, chinga da·o Executive Committee-ni on·enggipa ja 12-ni dormahako ra·jawa. Chingna chu·gimik ja 44-ni dormaharangko on·kuja dipet, chinga jingjengataniko dontongkujawa” ine Brithen Sangma parakataha.

GHADC-o kam ka·giparangsan ong·ja, Garo Hills gimikni manderangba, an·tangtangni nanga kamrangko GHADC office-o ka·na man·jaengani a·sel, namen neng·nikaniko man·tokenga, indiba pilakan ma·sichakpachina NGEA-ni President mol·molataha.

Uandaken, Garo Hills-ni dingtang dingtang NGO-ang, Civil Society Organisation-rang, Senior Citizen-rang, Nokma-Sanirang aro Garo Hills-ni manderang pilakan, GHADC-o kam ka·giparangni dormaharangko on·china dabie, Sombar waloni a·bachenge walgnina rama champenge jingjengataniko ong·atangaha aro NGO-rangni rama champenge jingjengatani Budbar pringni 5 bajio matchotangaha.