Tura, Aug 28,2024: Garo Hills Autonomous District Council (GHADC)-o kam ka·giparang ja 34-ni dormaharangko man·jaengani gimin, re·anggipa August 19 tarikoni jingjengata August 27 tariko sal 6 gapaha.
GHADC-o kam ka·giparang, ja 34-ni dormaharangko man·jani a·sel nokdangko chalaianio, namen neng·nikaniko man·engani gimin, changni chang GHADC-ni EM-rangko uamangni dormaharangko on·china mol·molahachim, indiba knachakteljani gimin, jingjengataniko dakna ga·akaha. Uni gisepon, “Chingni dabiako chu·sokatkuja dipetna jingjengataniko dontongjawa”, ine Non Gazetted Employees Association (NGEA)-ni President Brithen M.Sangma parakataha.
“Chingni indake jingjengataniko dakengon, da·alona kingkingba GHADC-ko chalaienggipa, EC-rang chingna maming ka·dongatani kattarangko on·kujaenga. Indiba anga ka·donga,chingni dabiako dilgiparang knachakchongmotgen ine anga bebe ra·a aro ka·donga” ineba Brithen Sangma aganaha.
Uni gimin, pilak A·chik a·songo songdongenggipa ma·gipa pagiparang aro ripengskarang chingni neng·nikaniko ma·sichakpachina NGEA-ni dilgipa mol·molataha.
“Chinga ja 34-na maming man·ani gri GHADC-o dangdike on·aha. Indiba chingni neng·nikaniko dilgiparang ma·sichakja aro chingna fix ka·gimin gitcham pay scale-kosa on·enba kal·ake roaha. Chingaba mandesan ong·e, salantion dingtang dingtang nanganirang gnang. Chingni dormaha maming dakeba nokdangko chalaina chu·ongja, uni gimin chingna fifth pay-ko on·na nangchongmota, iako chu·sokatja dipet chinga apsan daken ja·kuko de·anggen” ine Brithen Sangma parakataha.
“Chingna fifth pay scale-ko on·china batanggipa, 2017 bilsion a·dokni Governor ge·etaniko on·manahachim. Indiba GHADC-ni EC-rang financial position-ko pa·sike, na·simangna financial position namjoko fifth pay-ko on·gen, ine ku·rachakahani gimin, chinga 2017 bilsioni da·alona kingking sengaha. Indiba dilgiparang an·tangtangni ku·rachakatangkon gualaha. Uni giminsa chinga da·alo jingjengatna draatako man·aha” ine Brithen Sangma agandapataha.
