Tura, Aug 17, 2024:Garo Hills Autonomous District Council (GHADC)-o kam ka·enggiparang ja 34-ni dormaharangko man·kujaengani gimin, Non Gazetted Employees Association (NGEA)-ni gita re·anggipa July 30 tariko chanchirimaniko dakenba, GHADC-ni CEM aro EM-rangna sal 12 somoiko on·ahachim.

Indiba, GHADC-ko chalaienggipa EC-rang maming aganchakaniko on·jahani gimin, re·baenggipa, August 19 tarik Sombar sal dipet sima ari dongija, kam dontongate jingjengatanggen, ine GHADC-o kam ka·enggipa, Non Gazetted Employees Association (NGEA)-ni President Brithen M.Sangma parakataha.

Brithen Sangma-ni agana gitade, re·anggipa August 13 tariko GHADC-ni EM-rang NGEA-ni dilgiparangko okamate agangrikanio chu·sokna gita man·jaha. Maina GHADC-ni dilgiparang jasani dormahako gitcham fourth pay-ko dormaha on·na am·ani gimin, GHADC-o kam ka·enggiparang ra·chakna man·jaha.

“Jasa ba jagnini dormaha ong·oba, fifth pay-ko on·genchimode, chinga ra·chakgenchim. Indiba gitcham fix pay-ko on·na am·ani gimin chinga ra·chakjaha. Uni gimin chinga da·aldipet fifth pay-ko on·china dabie ja·ku de·enga. A·dokni dingtang dingtang sorkari department-rango kam ka·enggiparangna Fifth Pay, Sixth Pay aro Seventh Pay-ko dormaha on·na man·ode, maini gimin chingna on·skaja. Batanggimin 2017 bilsion, chingna fifth pay-ko dormaha on·china ge·etaniko ba order-ko on·manaha, indiba, da·alona kingking chingna fifth pay-ko on·gija kal·ake roenga. Chingaba GHADC-ni employee-rang ong·pae, fifth pay-ko dormaha man·na nangachongmota. Indiba maini gimin chingna fifth pay-ko dormaha on·skajaenga” ine Brithen Sangma sing·doataha.

“Chingna fifth pay-ko dormaha on·kuja dipet, chinga maming dakeba jingjengataniko dontongjawa”, ine NGEA-ni dilgipa agandapataha.