Tura, Sept 20,2024:Garo Hills Autonomous District Council (GHADC)-o kam ka·enggiparangni man·gni dormaharangko Fifth Pay Commission-o on·china dabie sal 23 asonge jingjengatani ja·man, bon·kamao Executive Committee, Fifth Pay Commission-ni Recommendation-o pangchake jasani dormahako on·na ku·rachakaha.
GHADC-o kam ka·giparangni man·kugijagipa ja 35-ni dormaharangko Fifth Commission-ni Recommendation-o on·china dabie sal 23, Non Gazetted Employees Association (NGEA) kamrangko ka·gija asonge jingjengataha.
GHADC-o kam ka·enggiparangna Fifth Pay Commission-ni dormahako on·na gita ku·rachakahani gimin, Tura-ni MDC aro BJP-ni State Vice President Bernard N.Marak GHADC-ni CEM aro Executive member-rangko mittelpilatakaha.
“GHADC-o kam ka·enggiparangni dabiani da·o bite nangna a·bachengaha, maina GHADC-ni EC-rang Fifth Pay Commission-ni recommendation gitan dormahako on·na ku·rachakaha. Ia ja·kuko de·ahani gimin, anga GHADC-ni CEM aro uni Executive Member-rangko mittelpilna sika. Ian District Council-ko nirok sandina seokatako man·gipa member-rangni daito ong·a. GHADC-o kam ka·enggiparangna Fifth Pay Commission-ni dormahako on·na gita namen rakbegipa kam ong·a. Indiba apsan ku·monge kam ka·anichisa ia neng·nikanirangko chel·chakna gita man·aha. GHADC-o neng·nikanirangko NPP dolsachi namatna man·jawa, indiba ma·mongo BJP sorkariko chalaienga. Unbaksana ANVC dolrangni sorkari baksa songgigrikanian a·doko ADC-rangko bilakbatatani ong·a” ine Bernard Marak parakataha.
BJP dilgipani parakatani gitade, GHADC-o kam ka·enggiparangna Fifth Pay Commission-ni recommendation-o pangchake dormaharangko on·china NPP-chi dilenggipa EC re·anggipa 2018 bilsion ge·etaniko on·manaha aro budget-oba fifth pay commission-ko passed ka·aha. Indiba kam ka·enggiparangna NPP-chi dilenggipa EC-rang da·onanaba Fourth Pay Commission-ni dormaharangkosa on·enga ineba Marak parakataha.
