Tura, March 18, 2026: Garo Hills Autonomous District Council (GHADC) Eleksin-na nomination file ka·anio ST Certificate-ko nangtelgipa ong·atna Albinush R.Marak-ni dilenggipa Executive Committee (EC) niamko ra·gatani ja·man, Garo Hills-o so·sojengjeng ong·ahani gimin, GHADC eleksin-ko jadokna ra·doatani ja·man, Albinush R.Marak CEM-ko watahani gimin, GHADC-ko chalaina gital CEM-ko seokaha aro gital Executive Committee (EC)-ko songaha.

GHADC-ko chalaina gita, March 16 tariko Special Motion-ko ong·ate, Naguapara-ni NPP MDC Dormonath Ch.Sangma-ko gital CEM-na seokaha aro Baldamgre-ni TMC MDC Stevie M.Marak-ko Deputy CEM-na seokangskaha.

Uandake, GHADC-ko gital EC-chi chalaiangskana, TMC MDC-rang baksa NPP MDC-rang apsan bakrimenba, gital Executive Member (EM)-rangko seokaha. Uamangara Silkigre-ni Ind. MDC Sengbath R.Marak, Kharkutta-ni TMC MDC Cherak W.Momin, Selsella-ni NPP MDC Arbinstone B.Marak, Bolsrong-ni NPP MDC Crozier G.Momin, Rongjeng-ni NPP MDC Henen R.Sangma, Williamnagar-ni TMC MDC Alphonsush R.Marak, Jengjal-ni NPP MDC Grahambell A.Sangma, Batabari-ni UDP MDC Ashahel D.Shira aro Amongpara-ni TMC MDC Nehru D.Sangma.

Indake ong·engon, GHADC-ko chalaina gital EC-ko songahaoba, CEM da·odipet gital EM-rangna portfolio-rangko sualkuja.