Tura,April 25, 2025: Garo HIlls Autonomous District Council (GHADC)-ni ‘Tol·gipa’ Chartered Accountant (CA) Sumit Kumar Jain Bohra baksa Memorandum of Understanding (MoU)-o soi ka·grikaniko den·galpilchina Tura-ni MDC Bernard N Marak, dabiangenba, antisani gisepo ua kamko chu·sokatja ong·ode, ua tol·gipa CA-ko GHADC-ni Consultant songanio jak donggipa sakantini kosako ain gita ja·kurangko de·anggen ine mikrakataniko on·ataha.
Iani bidingo GHADC-ni Secretary-na sedoatgipa chittio janapatani gitade, ua tol·gipa CA baksa MoU-o soi ka·grikaniko antisani gisepo den·galpilja ong·ode, ua tol·gipa CA baksa MoU-o soi ka·grikanio jak donggiparangni kosako ain gita ja·kurangko de·anggen, ineba Marak parakataha.
GHADC-ni Consultant dake songgipa Sumit Kumar Jain Bohra, CA Degree-ba dongja aro Council-o kam ka·na nanggipa Trading for Non-Tribal (TNT) Licence-ba dongja, uni gimin, ua mande baksa MoU-o soi ka·grikaniko ta·raken den·galpilchina Marak dabiangaha.
Bohra-ko GHADC-ni Consultant dake GST-ni kamrangna rakkienba, gong kror 8-na baten una tangkarangko gamna ku·rachake, gong kror 1.2-ko tangkarangko skang gamsoahani gimin, Tura-ni MDC, GHADC-ni ruling EC-rangko sing·doangaha.
Tol·gipa CA-na gong kror 1.2 tangkarangko skang gamsoaniara niamni a·palo ong·a aro ra·chakna man·gijani ong·a, ineba Tura-ni MDC parakataha.
Sumit Kumar Jain Bohra-ni Degree poraiani certificate aro gipin nangchongmotgipa lekkarangko sandichenggija, District Council-ni CA dake songahani gimin sing·doatenba, “Ua mandeko CA dake rakkina, Executive Committee (EC) tik ka·jagenchimode, sawarangsa MoU-o soi ka·skaha? Ua mande, angni constituency-ni ning·on dongenga, indiba TNT-ni Recommendation-na changsaba ango bi·a dongja,” ine Marak parakataha.
“Ua mandeo TNT dongjani gimin aro CA dake tol·gipa, Sumit Kumar Jain Bohra baksa MoU-o soi ka·aniko ta·raken den·galpilchina anga mol·molenga. TNT aro CA Degree donggijagipa, Non-Tribal-ko GHADC-o jakkalsretaniko chel·chakchina anga mol·molenga,” ine Marak parakataha.
