@ghdnews.in@

Shillong, Feb 16, 2026: NPP MDC aro da·o ong·enggipa Garo Hills Autonomous District Council (GHADC)-ni Chief Executive Membor (CEM) Pa Albinush R Marak, re·baenggipa GHADC election-o chena gita man·jawaha ine NPP una tikitko on·jaha.

Sombar salo, NPP-ni Working President aro PHE Minister Marcuise N Marak-ni kobor ra·timgiparangna aganani gitade, re·baenggipa GHADC election-o susana NPP tikitrangko sualanio, chenagipa candidate-rangnasa on·aha, indaken ia changni GHADC election-o Siju GDC constituency-ni MDC Albinush R Marak-na party-ni dilgiparang, tikitko on·jaha.

NPP-ni candidate-rangko seokna tik ka·anio bakrimchina party-ni dilgiparang Albinush Marak-ko mol·molahachim, indiba ua bakrimjaha ine Marak aganaha.

Indake ong·engon, GHADC election-o susana seokgimin sak 24 candidate-rangni bimingrangko skanggipa list-ko NPP-ni parakatanio, chenagipa.aro party-na kakket ong·gipa aro politics-ni kamrango changgipa sapgipa manderangko niesa seokaha ineba NPP-ni Working President parakataha.

NPP-ni sak 24 candidate-rangko, Regional Committee-ni recommend ka·anio pangchake, Prestone Tynsong-ni dilenggipa State Election Committee ra·chakaha ine Marak parakataha.

NPP-ni tikitna dorgasto galgiparangko jechakaniara altugipa kam ong·ja aro mitam constituency-rangode tikitna dorgasto galgiparang saksnimang ong·pilaha, ine janapatenba, party tikitna dorgasto galgipa candidate-rangko NPP-ni National President Conrad K Sangma aro gipin dilgiparang an·tangtangan grongaha ine Marak aganaha.