@ghdnews.in@

Tura, Jan 17, 2026:Garo Hills Autonomous District Council (GHADC)-ni Executive Committee (EC), adita dakna nangchongmotgipa kamrangko ka·na man·na gita, High Level Committee (HLC)-ko songe on·china a·dokni Dakchakgipa ba Deputy Skotong Minister Prestone Tynsong-na GHADC-ni Deputy Chief Executive Committee, Dy CEM Nikman Ch.Marak lekka sedoataha.

Sixth Schedule-ni ning·o Tribal-rangni a·arangko, jatni niam retirangko chel·chakna India-ni on·gimin niam, Article 244 (A), 275 (1) aro 371-o pangchake Autonomous District Council-ni Administrative-na dingtangmancha Scheduled Tribe-rangni gimin tarie on·gipa ge·etanirang gita, Tribal-rangni a·ao niamgri songdong a·chaanirangko champengsona gita lekka seataha.

Assam a·dok aro Bangladesh a·songni manderang niamgri naparukbagiparangko sima ari jolrango champengsona kamrangko ka·anggen ine janapatenba, ia ong·enggipa obostarangni bidingo Garo Hills-ni NGO-rang, niamgri songdong a·chagiparangko a·rikgalna kamrangko ka·anggenchimoba, chubatgipa gadangni dilgiparang aro sorkari baksa bakrimenba bilakbate kamrangko ka·na gita nangenga. Niamgri songdong a·chagiparangko am·sandigija donani a·sel, re·anggipa January 9 tariko saksa ACHIK Organisation-ni dilgipa, Dilseng M Sangma, janggitangko gimaatna nangaha ine Deputy CEM janapataha.

Iandakgipa obostarangan songsongenggipa manderangna namen jajrenganirangko ra·baenga baksana Tribal-rangko doke sate so·otanirang batanggipa bilsirangonin ong·enga. Uni a·selan songdongenggipa manderangna namen kenbeani ong·enga. Iani bidingo dingtang dingtang seokako man·gipa dilgiparang, NGO-rang aro songdongenggipa manderang sedoattokaha, ineba Marak janapataha.

Uandake ong·engon, Supreme Court aro High Court-ni dongimin niamrango pangchake Bangladesh aro gipin a·dokrangoni niamgri napsrukbae, Tribal manderangni biaprangko ra·sekdrae songdong a·chagiparangko am·sandie niam gita rakgipa sinjetaniko on·china gitaba, ua mol·molataha.

Uni gimin, a·dok sorkari High-Level Committee (HLC)-ko songe on·enba, a·dokni dilgiparang, GHADC aro Civil Society Organisation-rangni dilgiparangko seoke donchina janapatengon, niamgri songdong a·chaenggipa manderangko am·sandina Administrative-ni niamko ja·rike a·rikgalaniko dake Tribal-rangni a·ako chel·chakna, miksonganio a·dokni Deputy Skotong Minister-ko Marak mol·molataha.