Shillong, March 26, 2026: Garo Hills Autonomous District Council (GHADC) eleksin-ko ong·atani bidingo, District Council-ni dilgiparang baksa agangrikchengani ja·mansa a·dok sorkari, sal somoirangko tik ka·gen ine Budbar salo, a·dokni Skotong Minister Conrad K Sangma parakataha.

GHADC eleksin-o susaenggipa candidate-rang da·ode, Scheduled Tribe (ST) Certificate donggiparang ong·na nanggnok, ine GHADC-ni taridapgipa AD Rule-rangko a·dokni Governor Ch Vijayashankar, ra·chakani ja·man, District Council-ni dilgiparang baksa agangrikchengani ja·mansa, GHADC eleksin-ko ong·atna tarikko tik ka·na man·gen ine Skotong Minister parakataha.

Iani bidingo kobor ra·timgiparang baksa agangrikengon, “Chinga iani bidingo obostarangko nichengna nanggen, maina ia kamde a·dok sorkarini kam ong·ja. Iako anga talatna sikenga, anga saksa Skotong Minister ong·e, District Council-rangna chinga pangnan dakchakanirangko aro agan-ku·pattianirangko on·nasa man·aia, indiba kamrangko ka·anide District Council-ni jakosa ong·a,” ine Sangma aganaha.

District Council-rangara an·tangari jakgitel ong·e chalaigipa bimangsa ong·ani gimin, “District Council-de jakgitelgipa bimangsa ong·a aro an·tangtangni bilchi Council-ko chalaienggipa manderangni nangnikanirangko chinga nichengna nangaia. Chinga District Council-ni dilgiparang baksa agangrikenga aro da·o, GHADC-ni gital CEM aro EC-koba songahani gimin, uamang baksa chanchirimesa sorkari, ja·kurangko de·gen,” ine Skotong Minister aganaha.

GHADC eleksun-o Tribal ong·gijagipa manderangni bak ra·aniko champengna dabianichi, Garo Hills-o so·sojengjeng ong·ani ja·man, April 10 tariko ong·atna tik ka·gimin, GHADC eleksin-ko a·dok sorkari dontongataha aro GHADC-ni term-ko April 18 tarikoni a·bachengattaie jadokna ra·dodapataha.

GHADC-o gital CEM aro EC-ko songani ja·man, Tribal ong·gijagipa manderang bak ra·pana man·jana gita AD Rules-ko taridapenba, GHADC-o pass ka·aha aro ia niamko Monggolbar salo a·dokni Governor ra·chakaha ine Sangma aganaha.