Shillong, March 29, 2026:: Garo Hills Autonomous District Council (GHADC)-ni term-ko jadokna ra·dodapataniko bakkandikatchina aro GHADC eleksin-ko jagnini gisepon ong·atchina a·dokni BJP, a·dok sorkario dabiangaha.

BJP-ni ku·wattimgipa aro a·dokni gitcham IPS officer M Kharkrang-ni aganani gitade, GHADC eleksin-o susagiparang, Scheduled Tribe (ST) Certificate dongna nangtelgen ine parakatani ja·man, Tribal ong·gijagipa mande saksa, GHADC eleksin-o susana gita nomination file ka·drana jotton ka·ani a·selsa Garo Hills-o so·sojengjeng kajia ong·aha.

Phulbari-ni gitcham MLA Esmatur Mominin, manigija, GHADC eleksin-o susana gita nomination file ka·drana re·baani a·selsa Garo Hills-ni manderang ding·chaona a·bachengaha iaro uni iandakgipa kamara District Council-ni kosakon ra·biani ong·aha ine Kharkrang parakataha.

“Ua High Court-ni rai on·aniko sengna nangachim, indiba ua manderangni jegalako manigija dakdrana aro GHADC-ni bilko ra·sekna jotton ka·ani a·selsa Garo Hills-o so·sojengjeng ong·aha,” ine Kharkrang parakatenba, Garo Hills-o so·sojengjeng ong·ate manderangko ding·chaoatgipa mandeni kosako rakgipa ja·kurangko de·na nanga ine dabiangaha.

Eleksin-ko ong·atna gitade, pangnan tom·tomaniko nanga ine janapatenba, Garo Hills-o tom·tomaniko ra·bapilna man·na gita sorkari, jadokna senggija ta·raken eleksin-ko ong·atna nanga ine BJP-ni dilgipa didiataha.

Garo Hills-o so·sojengjeng ong·aniko BJP-sa politics kal·a aro BJP-na kam ka·giparang jak donga ine matnanganiko Kharkrang raken jegalataha.

“Manderangde je gitaba matnangaia, indiba BJP, darang dolkoba, toromni kosakoba indake so·sojengjeng ong·aniko ra·bagipa dol ong·ja,” ine Kharkrang parakataha.