www.ghdnews.in#

Tura, Feb 28, 2026: Garo Hills-ni dingtang dingtang dolrang re·baenggipa April 10 tariko ong·atna sienggipa, Garo Hills Autonomous District Council (GHADC) election-o Tribal ong·gijagipa manderang, chong·motan gipin jatrangni susaaniko jegaltokengon, GHADC election-o Scheduled Tribe (ST) Certificate-ko mongsonggipa dakataha aro uko nangtelaignok, ine parakataha.

Uni gimin, ST Certificate donggijagipa candidate-rang GHADC election-o susana gita man·jawaha. ST Certificate donggipa candidate-rangsan susana man·aignok, ine February 27 tariko GHADC-ni Chief Executive Member (CEM) Albinush R.Marak ge·etaniko on·angaha.

GHADC-ko man·chengaonin da·alona kingkingba, maming niamrangko taridapa dongkuja, Garo Hills-o ge 29 GHADC seat-rang gnang, uarang gimikan Ceneral Seat-rangsa ong·aia, uni giminan je jatba skatang GHADC election-o susana gita man·aia. Indiba da·aldipet GHADC-ni ge 29 seat-rangkon ST dakaha aro ST Certificate gri GHADC election-o susana gita man·jawaha. Je candidate-rangan GHADC election-o susana Nomination ka·engachim, ua somoio ST Certificate-ko mesokna man·ja na ong·ode, ua candidate-ni nomination lekarangko ra·chakjawaha ine GHADC-ni CEM parakataha.

GHADC election-o Tribal ong·gijagipa manderangni susaaniko champengatna dingtangmancha ian ja·ku de·ani ong·a aro ian A·chik jatna nangchongmotgipa niam ong·a. Iako A·chikrang ru·utbea sal somoirangonin nikna gita senge dongenga aro iako skangonin chu·sokatna gita man·chipjaha, indiba da·alo ia ge·etaniko chu·sokatna gita man·aha ine Marak aganaha.

Iani bidingo, February 17 tariko GHADC-ni Executive Committee (EC) tom·aniko ong·ate, GHADC election-o Tribal ong·gijagipa candidate-rangni susaaniko champengna tik ka·aha, ineba ua aganaha.

GHADC-o Tribal ong·gijagipa MDC-rang sakgni gnang, uamangara Zikzak-ni MDC aro Shyamnagar-ni MDC ong·a. Tribal ong·gijagipa manderang, Sixth Schedule-ni ning·o Tribal manderangna on·gimin bilko ra·sekna jotton ka·ani ong·a. Tribal ong·gijagipa manderang MDC ong·e, A·chik jatni maming niam reti, dakbewal rikbewalrangko ma·sija, indiba A·chik a·songko sason ka·na aro bilko ra·sekna cholko sandigiparangsa ong·a, ine nikna gita man·a.

GHADC-o ia Notification-ko on·na man·aniara, ‘Historical Notification’ ba ‘Gisik Ra·na Krabegipa Ge·etani ong·a’ aro ia Notification-ko an·ching A·chikrang ru·uta sal somoirangonin nikna gita senge dongenga. Da·alo CEM ka·dongbee iako ja·ku de·anina, ‘anga namen kusi ong·bea aro anga uko mittela’ ine GHADC-ni Deputy CEM Nikman Ch..Marak aganaha.

Ia notification-ko a·dok sorkari approve ba ra·chakna nangama ine sing·anina aganchakengon, GHADC-o ra·gatgimin niam ba notification-ko Executive Committee-o chanchie ra·chakani ja·man, CEM-ni soi ka·giminko a·dok sorkari, maming dakeba Interfere ka·na ba ra·chakgija dakna man·ja. GHADC-de Autonomy Body ba GHADC-na dingtangmancha on·gimin bilko rim·kepna man·ja, a·dok sorkarini approve ka·na nanggijan, GHADC bil man·a. Je niamkoba GHADC-ni EC tarina ba ra·gatna bil donga. Indiba Meghalaya a·doko ong·ani gimin, a·dok sorkari Governor-ni Gazetted-o segatna ba ra·gatnasa nangaia, ine Marak aganaha.

Ia notification-ko district administration-naba on·atgenma ine sing·engon, hoe da·o election-na skang Garo Hills gimikni district administration aro election commissioner-ni Returning Officer-rangna watataha aro man·sokuja ong·ode, watatgen. Jedakode, candidate-rangni Nomination file ka·ani somoio returning officer-rang ST Certificate, dongama dongja check ka·sogen aro ST Certificate donggijagipa candidate-rangni nomination lekkarangko den·galgen, ine Deputy CEM aganaha.