@ghdnews.in@

Chokpot, Feb 18, 2026: World Bank-oniko ra·bagimin PMGSY Scheme, jean district ge·antio bajar, song, skul, college aro hospital-rangona re·gipa rama jal·langko wachi a·rak re·na man·e tarina ra·bagipa, World Bank-ni tangkarangko phase 1 phase 2 aro phase 3 dake tarina man·a, indiba da·onan phase 1-kon, Garo Hills-ni mittam ramarangkon matchotchipgija donchipenga.

Mahendraganj pulis station sokna skang km 1 on·gipa rama dilsako tarienggipa sorok tarigiminni kosako black topping anna gong kror 3 lak 77 tangkarangko sanction ka·aha, ukon RIDF-ni tangkachi tarienga, ia kror 3 lak 77 tangkachi km 3 ba 4 ramako tarina man·pilgenchim, ua tangkarangko skatang jakkalsrete, Chokpot ramako tarina sokbagipa tangkako jakkalsrete Chokpot ramako tarigija dongenga ine Dr Mukul M.Sangma, Rongrikkimgre-ona wenangani somoio aganaha.

Mija Moamario DK Soba ong·ao, traffic jam ong·anan gari re·na man·jajok, una garioni ong·kate ja·achi re·angmittingo matam manderang, committee name sokachakja ine chanchisreta, indiba ia pilakan sorkariko chalaienggipa aro pulisrangni dakna nangipa kam ong·a. Traffic jam ong·ani a·selara pulisrangkon sak 200-san donani gimin, bang·bat manderangan gari jam ong·e, re·na man·jae Gilja sraptokjaha. Chengode pulisna sanction post-an sak 14 rangsan, angni chasongo revised ka·e komibeoba thana ge·sao pulisrang sak 40 ong·na nanga, category A-ode pulisrang sak 80 dongna nanga ine kamrangko recruit ka·e pulisrangko bang·dapatjok, battalion-koba nanggen ine sanction ka·jok aro Special Force-naba sanction ka·jok. Angni chasongo battalion-koba gital bikote sak 1,700 battalion-ko recruit ka·e, on·a baksana bang·a pulis station-rangko on·dapaha. South Garo Hills-ni Sangknigri , Silkigri aro Gasuapara pulis station-ko sawa on·a, anga on·jama? ine Dr Sangma sing·angaha.

Meghalaya a·doko mai ong·enga, uko nirike jaksi otchinan angko opposition-o donjok. Da·o ong·engipa Skotong Minister-ara maidake pulisni kamko ka·e retired ong·gipani biapo, gital post-rangko nakatatna man·skaja ineba Dr Sangma sing·doataha.

Da·o bang·a chadamberang kamgri chakchike dongtokenga, indiba chakchikani sima ari batjokode bretane ine re·anggipa bilsio anga Conrad Sangma-na aganaha, biaba hoemo ine aganchakaha.

Da·o re·baenggipa GHADC election-o, sichipgimin, District Council-ko tangatpilna, aro mikkim gnange ripingangna, na·simang member-ko seokon name chanchiesa jat gimik apsan ku·monge sakko aro badia dolko seokode, District Council-ko sawa nambate aro pangkame rikpiltaina man·gen, uko chanchina nanggen. Ong·jaode, an·chingna on·gimin District Council gimagnok.! Maina District Council-o kam ka·giparangnan beton on·na man·jae, NPP-chi chalaienggipa ruling EC-rang sichipatjok, ine Dr. Mukul Sangma Ronrikimgreo jinmana aganprakangenba, da·o election-na wenbae, tangkarangko on·e, voter-rangko man·na jotton ka·e na·songko majogen, indiba na·simangni ka·tongo kimkim ong·e, an·tangtangni gisikko bilgriatnabe ine Dr Sangma manderangko didiangaha.