@ghdnews.in@

Tura, Nov 26, 2025: A·chik State Peoples’ Front (ASPF), November 24 tarikoni a·bachenge, Separate Electoral Roll (SER)-ko Garo Autonomous District Council (GHADC) election-na skang ra·gate on·china, Poster Campaign-ko a·bachengataha.

“Chinga Non-Tribalrangni chong·motan gipin jatrangni GHADC election-o candidate ong·e susaaniko aro bak ra·aniko raken jegalenga, maina Sixth Schedule-de Tribal manderangni a·a, chia, niam reti aro sasoni bidingo chel·chakna aro ripingna on·giimin bil ong·a. Uni gimin, Non Tribal-rang Candidate ong·ani aro Vote pu·ona man·aniara, Sixth Schedule-ni niamko pe·ani ong·a. Chinga gipin jatrangni GHADC election-o bak ra·aniko champengna gita, Separate Electoral Roll-ko ta·rake ra·gatchina GHADC-ko chalaienggipa EC-ko mol·molenga” ine ASPF parakataha.

Iani bidingo ASPF-ni dilgiparang re·anggipa November 17 tariko GHADC-ni Deputy CEM Pa Nikman Ch.Marak aro EM Stevie M. Marak-ko gronge memorundum-ko on·aha. Apsandaken, “Chinga Separate Electoral Roll aro dingtang dingtang issue-rangko ra·e, Meghalaya a·dokni Governor-ko gronge memorundum-ko on·aha” ine ASPF-ni Chief Organising Secretary Raksim Marak parakataha.

ASPF gipin jatrangni GHADC election-o bak ra·aniko raken jegala aro champenganggen, ine parakatenba, poster campaign-rangko a·bachengatengataha, uni ja·mano A·chik A·songni kona noksikrangona re·e jatko de·mesana aro ku·cholsan ku·rang on·e jegalna gita Public Meeting-rangko ong·atgen aro sit in demostration-ko ong·atgen. Uni gimin A·chik jat sakantian ku·mongapachina Marak didiataha.