@ghdnews.in@

TURA, FEB 10, 2026: Garo Hills Autonomous District Council (GHADC) election-na skang, Bharatiya Janata Party (BJP)-ko bilgriatna ong·gija kamrangchi man·gipa tangkarangko jakkalenga ine Sombar salo, BJP-ni State Vice President aro Tura-ni MDC Bernard N Marak matnangataha.

Bangladesh a·songoni niamgri napsrukbagipa manderangko a·rikgalna man·jaenggipa aro tangka jakkalsretgipa dilgiparangni kosako BJP chadengenga ine Marak parakataha.

Marak-ni parakatani gitade, Garo Hills-o bang·a manderangan kangal cholgri ong·kuengani Skotong Minister-ni manderang, ong·gija kamrangchi tangka paisarangko man·skaenga aro kangal cholgrirangni janggi tanganiko nisie galenga.

Niamgri koela bikotani, niamgri koela salani, niamgri ro·ong bikotani matchotgijagipa contract-rangni kamrang aro tol·e tarigipa bill-rangonikon NPP-ni dilgiparang, hisapgrigipa tangkarangko chimongenga, ineba BJP-ni Vice President matnangataha.

Re·baenggipa GHADC election-na skang, Garo Hills-o BJP-ko watchina, BJP-ni member-rangna Lakni Lak aro Krorni Kror’ tangkarangko on·enga ineba ua matnangataha.

Batanggimin bilsi 5-ni gisepo National People’s Party (NPP), BJP-ni MDC saksako ruling-o done, sakgipinko opposition-o donskae ma·ekatna jotton ka·aha ineba Marak matnangataha.

BJP-ni MDC saksanade chu·gimik man·gnirangko on·e, sakgipinnade mamingkon on·skagija, BJP-ni gisepo meligrikgijaniko ra·bana jotton ka·aha ine Tura-ni MDC matnangataha.

Mitam contractor-rangnade, scheme-rangko ku·rachakenga indiba ia scheme-rangara ja·mande ‘me·mang’ project-rangsa ong·skaenga ineba Marak matnangataha.

BJP-na kam ka·giparangko NPP sorkari, miksongmanchaen kal·ake roenga ine matnangatenba, batanggimin 2022 bilsio uni Bank Account-rangko Conrad Sangma-ni sorkari “Chipe donaha” ba “Freeze” ka·aha aro ua Account-ni tangkarang gimaaha ine BJP-ni State Vice President parakataha.

Niamgri koela bikotani aro salruraaniko dakjagenchimode, ong·gija kamrangko ka·jaode banoni tangkarangko man·skaa ine Marak sing·doataha.