Tura, March 20, 2026: Batanggipa adita salrangna skang Garo Hills-o so·sojengjeng ong·ani bidingo Tura-ni bilsi brigipa aro NGO-ni dilgipa saksako rim·aha ine jako sildeng patako noksa tarie Social Media Facebook-rango gipatenggipa koborko West Garo Hills a·jani SP Abraham T Sangma Bristibar salo jegalatenba, da·o dipet so·sojengjeng ong·ani bidingo pulisrang, bilsi brigimin manderangko rim·a dongkuja ine parakataha.

Social Media Facebook-rango noksa tarie gipatgipa koborko jegalatenba, ian Artificial Intelligence (AI)-chi tarigipa noksasa ong·a aro ian tol·gipa koborsa ong·a ine West Garo Hills a·jani Superintendent of Police (SP) talataniko on·ataha.

Garo Hills-o so·sojengjeng ong·aniko bariatna miksonge, badiaba manderangni tol·e tarigipa noksa aro koborsan ong·aia.“Tura-ni bilsi brigimin mande saksa aro NGO-ni dilgipako handcuff pate pulisrangni rim·anggipa noksa Social Media-rango, mongsongbate Facebook-o giproroenga ine West Garo Hills a·jani Pulis koborko man·soaha.

Ia so·sojengjeng ong·anina da·o dipet bilsi brigipa manderang darangkoba, West Garo Hills a·jani pulisrang rim·a dongkuja. “Chinga iani bidingo talataniko on·na sika. Ia noksara AI-chi tarigipasa ong·a aro tol·gipa koborsan ong·aia. Ian Garo Hills-o so·sojengjeng ong·aniko ding·chaobatatna, badiaba manderangni jotton ka·anisa ong·enga,” ine Sangma parakataha.

Iandake tol·gipa kobor-rangko bebe ra·jachina aro ong·gijagipa kobor-rangko giproroatjachina manderangko didiatenba, iandakgipa kobor ba noksarangko watna skang, kakket ong·ama ong·ja, uko name sandichengchina, West Garo Hills a·jani SP mol·molataha.Social media-rango iandake tol·gipa kobor-rangko man·sogenchim ong·ode, ta·raken sepangbatgipa pulis station, outpost, beat house-na kobor on·ate, ia +918837423053, +917005530510, +919089199064 monile nomber-rangona phone ka·e, Pulis Control Room-ona u·iatpachina SP didiataha.