@ghdnews.in@

Tura, Jan 28, 2026: Monggolbar salo GHADC-ni Deputy CEM Nikman Ch.Marak, Tura-ni dingtang dingtang NGO-rang aro Civil Society Organisation-rangko okamate, CEM-ni nokdringo tom·e chanchirimaniko dakangaha.

Ia chanchirimanio Garo Hills-ni sima arirango Marketing Hub ba Stock Market-ko rikna miksonganiko parakangengon, tom·bagipa dingtang dingtang Civil Society Organisation-rang namnikpaaniko parakangenba, adita suggestion-rangko on·dapangtokaha.

Ia Sock Market-ko rikanichi Garo Hills-o man·gipa dingtang dingtang bolam-biterangko ia market-o bajaro chimongna man·gen, uanoniko gipin a·dokrangchi watatna ba ra·angna man·gen. Undake Garo Hills-o man·gijagipa bosturangko ba me·su-samjakrangko ra·baskana man·gen, ia miksonganio GHADC-ni gita sima ari jolrango ge 4 Sock Market ba Marketing Hub-ko rikna miksongenga ine Deputy CEM Nikman Ch.Marak aganaha.

Ia Stock Market-ko rikahaode, gipin jatrang Garo Hills-ona re·bae me·su-samjakrangko palna nangjawaha, ia marketon palna man·aignok aro dingtang dingtang nolam-biterangkoba re·bae ra·na nangjawaha, ia marketonikon ra·angna man·aignok, ineba Marak aganaha.

“Chinga GHADC-ni gitan damrangkoba tarigen, ua rate-o ba damosa palna aro ra·angna man·gen. Unbaksana niamrangko tarigen. Maina Garo Hills-o bading chiwalgipa manderang bang·batan gipin jatrangsa ong·aia, indiba ia stock market-ko rikahaode, A·chikrang bading chiwale janggi tangna cholko man·gnok. Chinga ta·raken ia kamko a·bachengatgnok. Ia miksonganiko NGO-rangba namnikpaaha aro adita suggestion-rangkoba on·angtokaha” ine Deputy CEM aganaha.

Garo Hills-o iandakgipa stock market-rang dongjani a·selan, gipin jatrang Garo Hills-ona naprurue bading chiwalanirangko dakenga aro so·sojengjeng ong·atenga. Beben gipin jatrangko namnikja, inede ong·ja, indiba bisong a·doktango man·gipa bosturangko Garo Hills-ni bajar antirangona ra·napbae palna man·jawa, ia stock market-osa palna man·gen. “Ia miksonganiko chinga skangonin chanchisamsoe donmanaha. Iako ja·ku de·anio pilak A·chik a·songo songdongenggipa manderang apsan ku·monge kam ka·aniko nangnikenga ine Marak agandapataha.

Indiba iako a·bachengo adita neng·nikanirangko chagrongnaba donga, indiba A·chik a·songo songdongenggipa manderang pilakan chakchike jak on·pana nanggen, ineba Marak aganaha .