Shillong, Mar 24, 2026: Garo Hills-ni NGO-rang chong·motan Garo Students’ Union (GSU) CEC HQ Tura, FKJGP, ADE, AYWO, NAD, GGU, AIGU, Tura-ni Senior Citizen, Revrend-rang, Pamongrang aro uandake dingtang dingtang dolni dilgiparang apsan ku·monge, Monggolbar salo Meghalaya a·dokni Governor CH Vijayashankar-ko gronge, Garo Hills Autonomous District Council (GHADC) eleksino candidate ong·e susana gita Scheduled Tribe (ST) Certificate-ko nangtelgipa ong·atchina didiangaha.

Indian Constitution-ni Sixth Schedule-ni ning·o donggipa Para 12A-ko taridapchina gitaba GSU, a·dokni Governor-ko didiangaha.

GSU aro dingtang dingtang dolrang a·dokni Governor-ko grongani ja·man, kobor ra·timgiparangna talatengon, GHADC eleksino susana gita, ST Certificate-ko nangtelgipa ong·atchina NGO-rang, a·dokni Governor-ko mol·molaha ine GSU CEC, HQ-ni President Tengsak G Momin aganaha.

Indian Constitution-ni Rule 128 aro Para 12A-ko taridapchina gitaba, NGO-rang a·dokni Governor-ko didiaha ine Momin aganaha.

Sixth Schedule-o Tribal-rangna on·gimin bil aro daka rikanirangko chel·chakna gitasa, Sixth Scheduled-ko on·ahani gimin, GHADC eleksino Tribal ong·gijagipa manderangko bak ra·na on·aniara, Sixth Schedule-ni niamko pe·eani ong·a ineba GSU President aganaha.

NGO-rang-ni mol·molaniko a·dokni Governor chu·sokate on·na ku·rachakataha ine janapatengon, Electoral Roll-rangko Special Intensive Revision (SIR) dakna gitaba ua ku·rachakaniko on·ataha ine Momin aganaha.

GSU President-ni parakatani gitade, GHADC eleksino pu·ongiparangna aro candidate-rangna ST Certificate-ko nangtelgipa ong·atna gita eleksin-ni niamrangko taridapani bidingo a·dokni Skotong Minister Conrad K Sangma, baksaba agangrikaha ine Governor, NGO-rangna aganataha.