@ghdnews.in@

Tura, Dec 14, 2025: Garo Hills-ni chonchongipa jatrangna, Minority Regional Council (MRC)-ko on·china dabianiko A·chik Conscious Holistically Integrated Krima (ACHIK) Organisation jegalatenba, MRC-ko songe on·genchimode, A·chik jatrangni Constitutional Rights ba bilko pe·ani ong·gen ine parakataha.

Minority Regional Council-ko songe on·china dabie, chongipa jatrangni ja·ku de·aniara, Indian Constitution-ni Sixth Schedule-ko jegala gita ong·enga, je bilkon Garo Hills-o songdonggipa A·chikrang ba Tribal jatrang an·tangtangan jakgitele an·tangtangchi sason ka·china dingtangmancha on·gimin bil ba niam ong·a ine ACHIK Organisation parakataha.

“Indiani Niam-Bidiko segatgiminoniko dingtang dake, Minority Regional Council-ko songgenchimode, ian niamni kosako dakbadeani kamsan ong·aija, indiba Sixth Scheduled-ni bilko ra·biani ong·gen” ine ACHIK Organisation-ni seatgipa chittio janapataha.

Iako dabianina Garo Hills-o songdonggipa Minority jatrangko mantnangatengon, MRC-ko songe on·china ja·ku de·aniara, chonbegipa Garo Hills-ko, ‘‘Bak ong·ataniara Constitution gita ong·ja aro A·chikrangni dakbewal ba Constitutional Rights-na neng·nikaniko ra·bagen” ine ACHIK Organisation parakataha.

Indake, uamangni MRC-ko songe on·china dabianiara political-ni gita didiataniko man·ani giminsa ong·enga aro tribal jatrangni gisepo nanggrikatna aro songsalo meli-nangrime donganiko kajia ong·atna dakanisan ong·enga, ineba ACHIK Organisation-ni seatgipa chittio janapataha.

“Tribal-rangna on·gimin bilko onchepna jotton ka·aniko aro Garo Hills Autonomous District Council (GHADC)-na on·gimin bilko bilgriatna jotton ka·aniko, chinga maming dakeba nie dongjawa,” ACHIK Organisation janapataha.

Tribal jatrangna on·gimin bilko warachakna Garo Hills-ni pilak A·chikrangko, Civil Society Organisation-rangko aro songko nokko dilenggiparangko ku·cholsan bakrimpachina ACHIK Organisation mol·molaha.

Indiani Constitution-o on·gimin bilko aro Itihas-o galchipako man·anina, chonchongipa tribal jatrang jekai Hajong, Koch, Rabha, aro Mann jatrangna, Regional Council-ko songe on·china, Regional Council Demand Committee (RCDC), Meghalaya a·dokni Governor CH Vijayashankar-ko Shillong-o gronge, uni dakchakaniko bi·aniara A·chik jatko chonnikani gitaba ong·a, ine ACHIK janapataha.

Garo Hills-o songdonggipa chonchongipa tribal jatrangna bilake kamrangko ka·na aro silroroaniko ra·bana man·na gita Hajong, Koch, Rabha, aro Mann jatrangna Regional Council-ko songe on·china gita, Regional Council Demand Committee (RCDC), Meghalaya-ni Governor CH Vijayashankar-ko mol·molaniara, A·chik jatrangni ra·chakna man·gijani ong·a, ineba ACHIK Organisation parakataha.