Tura, April 30, 2025: Garo Enlightenment Society (GES), East Garo Hills a·jani Mangsang Morongga jolo A·chikrangni a·ako Khasi HIlls Autonomous District Council (KHADC)-ni ra·sekdrae ro·ong songani bidingo ta·rake sandirokaniko dakchina dabie, Garo Hills Autonomous District Council (GHADC)-ni Chief Executive Member (CEM) Albinush R.Marak-ko gronge chitti sedoangaha.

KHADC niamgri dake Garo Hills-ni a·arangko sekdrae, sima ario ro·ongrangko songdrae, songni manderangko dagrangenba, pulisrangko watatna ka·mikkenataha. KHADC-ni indakgipa kamrangara A·chikrangna namen sinjetaniko on·engasan ong·aigija, a·a nokgiparangna namen neng·nikataniko ra·baenga ine GES-ni President Clincton Marak parakataha.
.
Ua obostako kobor man·soe, adita salrangna GES-ni dilgiparang Morongga jolona re·ange songni Sordar aro songni manderangko gronge, sing·sandianiko dakahaon, KHADC-ni official-rang, GHADC-ni maming permission ba ge·etaniko ra·gija, A·chikrangoniko niamgri kajirangko gildraaniara autonomous district council-ni niamko pe·ani ong·a ine GES-ni CEM-na sedoatgipa chittio janapataha.

GES-ni parakatani gitade, tribal manderangni a·arangko chel·chakna aro jakgitele jattangni dakbewalo pangchake janggi tangchina, British Raj Simon Commission, dingtangmancha administration-ko on·aha. Uano pangchake Bengal Provence, 1927 bilsio Garo aro Khasi jatgni manderangni gisepo sima arirangko tarie on·china Survey Team-ko watataha.

Indake,JM David aro Malai Lasker-ni dilanichi Survey ka·aniko nirokaha. Unbaksana British sorkariba arearangko namedake ma·sina aro sima arirangko tarina 1933 bilsio Interim Survey Team-ko songaha. Uandake, British-ni somoio sima arirango songanggipa adita ro·ongrang Dobil Songgital-o da·onaba dongkuenga. Ua chasongonin Morongga A·king Garo-rangni ong·a aro Nongbak Arengh ma·chongni A·king ong·a, ine GES parakataha.

Uni gimin, ua obostani bidingo ta·rake ja·kurangko de·enba, sing·sandianiko dakchina aro gimaangenggipa Garo-rangni a·arangko chel·chakna aro a·a nokgiparangko naljokate, mikkangchi a·a ra·sekaniko champengchina GES, CEM-ko didiangaha.

“Chinga ia obostani bidingo sandianiko dakchina aro nanga gita ja·kurangko de·e, niamgri a·a ra·sekdrae, niamgri kajina gilanirangko dontongatchina mol·molatenga. Mikkangchi A·chik manderangni kosako ong·gija kamrangko ka·taijachina aro sinjetanirangko on·jachina” GES-ni President Clinton Marak CEM-ko didiataha.

GES-ni mol·molaniko CEM knachakenba, ta·raken ua obostani bidingo sandirokaniko dakgen ine ka·dongani kattarangko parakataha. Jena kingking KHADC, A·chikrangni kosako ong·gija kamrangko ka·e sinjetaniko on·enga aro niamgri kajinarangko gilenga, GES dontonggija raken kamrangko ka·anggen aro A·chik a·songko maming dakeba ra·sekna on·jawa ine Marak parakataha.