Baghmara, April 14, 2025: South Garo Hills a·jani Gasuapara C&RD Block-ni ning·o donggipa, dingtang dingtang songo Mahatma Gandhi National Rural Employment Guarantee Act (MGNREGA)-ni Village Employment Council (VEC)-rang, NGO-rang aro songni nokni dilgiparang Sombar salo Gasuapara kal·chakram biapo tom·e chanchirimaniko dakangaha.

Uamangni tom·e chanchirimani ja·tingara, Gasuapara C&RD Block-ni ning·o MGNREGA-ni Job Card-o kam ka·e cha·giparangna batanggipa 2023 aro 2024 bilsio kam ka·giminrangni tangka paisarangko bang·a VEC-rangna on·gija, donengani gimin aro PMAY baksa MGNREGA convergence ong·e, sal 100-na on·gipa kamrangko chu·onga gita on·jaha ine songni manderang parakataha.

MGNREGA-ni dongimin niam gita sal 100 kam ka·e cha·na on·gipa kamrangko mitam VEC-rangde chu·gimik man·jaengani gimin mai ja·kurangko de·gen ine chanchirimaniko dakaha.

Dingtang dingtang VEC-rang pilak nanga lekkarangko block office-o somoi gita sokatgenchimoba aro Office-ni dongimin niam gita kamrangko matchote ka·genchimoba, tangka man·gijani gimin, Block Office-ona re·ange sing·sandianiko dakon mitam, VEC-rangko Block-ni officer-rang, pulisrangko okamate ka·mikkenatna jotton ka·aha ine tom·anio mitam VEC-rang parakangaha.

Bang·a changon, indake VEC-rangni neng·nikaniko Block-ni officer-rang matchotate on·ani pal, tol·e kattarangko aganenba bang·a bilsirangna namjripate donaha. Basakoba Central-oni tangka watatja, basakoba State-o tangka bon·changa ine pa·sike watatongachim.

Uni gimin, April 14 tariko dingtang dingtang songni VEC-rang MGNREGA-ni Job Card-o kam ka·giparang tom·e, chanchirimaniko dakenba, Gasuapara C&RD Block officer-rangni kosako Meghalaya High Court-o PIL ka·na tik ka·angaha ine songni manderang parakataha.