Baghmara, Nov. 3, 2024: South Garo Hills a·jani Gasuapara block-ni ning·o donggipa songni manderang, MGNREGA-ni tangkarangko man·kujaengani gimin, jinma tom·e chanchirimaniko dakangaha.

Job Card-ni tangkarangko ru·uta somoirangonin man·kujaengani gimin songni manderang namen neng·nikaniko man·tokenga. Salanti hajira ka·e cha·enggipa jolni manderang, job card-ni tangkako man·na ka·donge dongengon, da·onaba man·kujaenga. Maini gimin, kam ka·gimin job card-ni tangkarangko man·tokjaenga, ta·rake on·china Gasuapara block-ni authority-rangko songni manderang mol·molataha. MGNREGA Scheme-ara ma·mong sorkarini kangal cholgri manderangna kam ka·e cha·china on·atgipa chol ong·achim. Indiba songni manderang an·tangtangni kam ka·gimin hajirako da·onaba man·kujaengani gimin sorkariko nirokatpachina songni manderang mol·molataha.

Songni manderang jemangan Aadhaar Card-ko Bank Account baksa link ka·kuja aro sianggipa manderangni Death Certificate-rangko on·kujani a·selsa job card-ni tangkarangko man·jaenga ine block-ni official-rang manderangni sing·anina aganchakaha.

“Chinga bank account baksa aadhaar link ka·gimin aro sianggipa manderangni death certificate-rangko block office-o on·manaha. Indiba maini gimin chingni kam ka·giminni tangkarangko man·jaenga” ine songni manderang sing·ataha.

“Chingaba office-ni kamrangko ma·sichaka, indiba indita jaarangna job card-ni tangkarangko man·kujaengani giminsa, ta·rake on·pachina sorkariko mol·molenga. Maina bang·a nokdangrangan job card-ni tangkana ka·donge sengpaenga. Chinga iani bidingo block official-na chitti seatna gitaba tik ka·aha” ine songni manderang parakataha.