Tura, March 26, 2026: Garo Hills-o so·sojengjeng ong·aniara, Bharatiya Janata BJP aro NPP-ni dolgni ‘chalakki’ dakani a·selsa ong·engnaba gnang ine adita salrangna skang, Congress dolni matnanggipa kattarangko BJP raken jegalataha.

Garo Hills-o so·sojengjeng ong·aniara BJP aro NPP-ni nangrime, ‘chalakki’ dakani a·selsa ong·engnaba gnang ine Meghalaya Pradesh Congress Committee (MPCC)-ni president Vincent H.Pala-ni matnanggipa kattarangko jegalatenba, uni iandake agangipa kattarangara, manderangko dilsretna jotton ka·anisa ong·enga aro Congress dolonin member saksa manderangni kosako ja·kuko de·ahani a·selsa so·sojengjeng ong·anirang ong·kataha ine BJP-ni State Vice President aro Tura-ni MDC Bernard N Marak matnangatskaaha.

Garo Hills-ni manderang, Tribal ong·gijagipa manderangni GHADC eleksino bak ra·aniko jegaltokengon, Congress dol Muslim candidate saksako, sriksrik nomination file ka·na Tura DC office-ona watani ja·mansa so·sojengjeng ong·na a·bachengaha ine Marak matnangataha.

Marak-ni parakatani gitade, ua Muslim candidate, nomination file ka·na skang a·dokni Skotong Minister, Dakchakgipa Skotong Minister aro Opposition dolni dilgipa baksa agangrikchengaha, indiba uni janggilo donggipa MPCC-ni President Vincent Pala aro gipin Congress dilgiparangko ua biming mingjaha.

Congress dolni BJP aro NPP-ko matnangronga gita Pala-ba da·o apsan daken BJP aro NPP-ko matnange, an·tangtangni kamrangna Mominin-kosa jinmani mikkango dos donggipa gita mesokna jotton ka·skaenga ineba Marak aganaha.

Mominin-ni Congress-o bak ong·aniko Pala jegaljaha ine janapatenba, Mominin gitcham MLA aro gitcham MDC-ba ong·e da·o Congress dolni member-an ong·engkua.
Mominin-ni kamrangna Vincent Pala, daiko ra·na nanga ineba BJP-ni State Vice President dabiangskaha.

“Phulbari-ni gitcham MLA Mominin, Congress party-an ong·kuengani gimin ia so·sojengjeng ong·atanio Pala, an·tangni dosko ku·rachakna nanga,” ine Marak dabiangkuaha.

Garo Hills-o so·sojengjeng ong·anina rim·a man·gipa bang·bata manderangan BJP-ni member-rangsa ine matnanganiko jegalatskaenba, rim·a man·gipa manderangni bimingrangko aro ua manderangni gimin talataniko on·china Marak, Pala-o dabiangaha.