Shillong, March 20, 2026: Re·anggipa March 9 tarikoni adita salrangna, Garo Hills-o so·sojengjeng ong·anganina Congress, NPP-chi dilenggipa a·dok sorkariko matnangatenba, ia pilakan BJP aro NPP-ni chalakki dakanisa ong·enga ine chanchichipaniko parakataha.

Ia so·sojengjeng ong·aniko BJP-sa a·bachengatahani gimin ian BJP aro NPP-ni chalakki dakanisa ong·enga ine Sukrobar salo, Meghalaya Pradesh Congress Committee (MPCC)-ni President Vincent H. Pala parakataha. “Ia a·sel ing·anina rim·a man·gipa bang·bata manderangan BJP-ni manderangsa ong·a,” ine Pala kobor ra·timgiparangna aganaha.

BJP aro NPP-ni kosako matnangatengon, BJP-de pilak biaprangon dingtang dingtang jatrangni gisepo golmal ong·aniko ra·baronga ineba Pala aganaha.

“BJP, Hindu aro Muslim-rangni gisepo golmalko ra·baronga aro je biaprangon Hindu aro Muslim-rangni gisepo golmalko ra·bana man·ja, uandakgipa biaprangode uamang, Tribal aro Tribal ong·gijagipa manderangni gisepo golmalko ong·atronga,” ine Pala janapatenba, Meghalaya a·doko gital party, BJP-ni dakronga gitan Khasi, Garo aro Jaintia-rangni gisepo golmalko ra·bana jotton ka·enga ine matnangataha.

Garo Hills-o ong·anirangko BJP aro NPP, altuaen namatna man·aiachim. Tribal aro Tribal ong·gijagipa manderangni nok-jam aro dokkanrangko so·e galaniara namen kragijani ong·aha ine MPCC-ni President parakataha.

“So·sojengjeng ong·gnirangko kobor man·genchimba, sorkari maming ja·kurangko de·jahani a·selsa A·chikrangni dokkanrangko bang·en so·aha,” ine ua parakataha.

Vincent Pala-ni aganani gitade, iani bidingo A·chikrang ding·chaoaona sokgen inen sorkari namen ma·sisoachim, indiba sorkari dal·e ra·jaha aro ia obostako name niroksojaha. GHADC eleksinko ra·doatani giminba, ua a·dok sorkariko matnangataha.

“Constituency damgniosan neng·nikanirang dongaiachim aro ua constituency damgniosa eleksinko dontongatna nangachim, indiba NPP, eleksino ama cha·na siengako ma·siahani giminsa eleksinko ra·doaha” ine MPCC-ni President parakataha.