@ghdnews.in@

Tura, Jan 25, 2026:A·chik a·song gimikni dingtang dingtang Pressure Group-rang, mijal Sonibar salo, chong·motan January 24 tariko Tura Dakopgre-o donggipa SMELC conference hall-o tom·e chanchirimaniko dakenba, re·anggipa January 9 tariko ACHIK Organisation-ni member saksa Dilseng M.Sangma-ko Goalgaon songo rorirang doktate siatanio jak donggipa manderangko ta·rake rim·enba, uamangna rakbatgipa saatirangko on·china, a·dok sorkari sianggipa nokdangna gong lak 50-ko Ex-Gratia on·china, GHADC-ni gitaba lak 50 Ex-Gratia-ko gamchina NGO-rang dabiangtokaha.

Ia a·selni bidingo so·sojengjeng ong·engon, mikkangchi iandakgipa a·selrang ong·taijana gita Garo Hills-ni nangrimgimin dingtang dingtang NGO-rang, apsan ku·monge, Garo Hills-ni kona noksikrango kamrangko ka·angna dolsa Joint Action Committee (JAC)-ko songaha.

Da·odipet JAC-ni dilgiparangna fortpolio-rangko parakatkuja, indiba dingtang dingtang NGO-rangoniko sakprak biming minge donangchengaha. Ja·mano dilgiparangni fortpolio-rangko parakatgen.

Seoke donanggimin member-rangara GRPCC-ni President Dr. Merril N.Sangma, AIGU-ni President Lening Great K Sangma, DINDAM-ni President Ma Jaynie Ningring N.Sangma, AAYF-ni President Salsam R.Marak, AAYWS-ni President Jingjing N.Sangma, GOERA-ni President Thomas N.Marak, ASWA-ni President Walman R.Marak, ADIL-ni President Francis C.Marak, GSMC-ni Acting Chairman Balkarin Ch.Marak, ACHIK Organisation-ni President Macklawrence M.Sangma.

Tom·anio dingtang dingtang dolni dilgiparang, A·chik a·songo ong·enggipa obostarangni chanchie, mikkangchi A·chik a·songko chel·chake rakkiangna miksonge adita ming Resolutiong-rangko ra·gataha, uarangoni mongsongbatgipa mingsara, re·baenggipa GHADC election-o gipin jatrangna party ticket on·aniko raken champengna tik ka·angaha. Uni gimin, je political dolba Muslim-rangna party ticket on·na man·jawa, ine pilak political dolrangko didiatenba, manigija je political dolba gipin jatrangna party ticket on·genchimode, Garo Hills gimiko jingjengataniko dakna tik ka·angaha. Minggipinara, gipin jatrang darang authority-ni ge·etaniko man·gija ba lekkarang gri skatang A·chik songrango nape bostu palanirangko, gue aro gipin bosturangko bading chiwalgiparang, kenta menta ra·giparangko A·chik songrango napna on·gija champengatna tik ka·angenba, songni Nokmarang baksa ku·monge mikkrakatani program-rangko ong·atna gitaba NGO-rang tik ka·e jak songe ra·chakangtokaha.

“A·chik a·songko name ripingchina, India-ni Constitution-o Sixth Scheduled-ko on·aha, ian Tribal manderangko chel·chakna aro ripingna on·gimin bil ba niam ong·a. Tribal manderangko chong·motan A·chik jatko ripingna, Garo Hills Autonomous District Council (GHADC)-ko on·aha. GHADC-ni ning·o Nokmarangni bil songdong a·chagipa manderangko chel·chakani ong·a. Da·alo je a·selrangko chagrongna nangengachim, ian Nokmarangni bilko ma·sichakjae, GHADC-ko dilgiparang bilgriataha. Uni a·sel ‘Tribal Rights’-ko gimaatengaha. Sixth Scheduled-ko dal·e ra·ja gita ong·enga. Tribal-rang ia bilrangko A·chik a·songo ku·monge, rktaipilani sal sokaha. Matgrik Dilseng M. Sangma-ni siani indin ong·gramaijachina, indiba chasongni chasongna gimagija A·chik a·song jakgitelaniko man·china,” GSMC-ni Acting Chairman Balkarin Ch.Marak agan-ku·pattianiko on·angaha.

“Anga A·chik a·song gimikchi re·roroe kamrangko ka·engon, Pulbari jolrango bol cha·ue sallangiparangko bang·en nikaha. Uarangko Forest Department-na u·iatronga, indiba bang·bata changon chu·sokatrongja. Battanggimin salrango je obostarang ong·aha, indiba mikkangchi, iandakgipa obostarang ong·taijachina ku·monge, A·chik jat gimik re·mikkangna aro Tribal-rangna naljokaniko ra·bana,” DINDAM-ni President Ma Jaynie Ningring N.Sangma ku·mongpaaniko on·angskaha.

“Battangimin somoio a·sel ong·e siangipa Matgrik Dilseng M. Sangma-ni gimin talattaniko on·angani gitade, “Salsagipao chinga Wadagokgre songona re·ange, Muslim-rangni niamgri skatang Nokma a·kingoniko ro·ong bikotaniko sandion maming lekkarangko man·jaha. Nokma-rango sing·ora, beng·oba manija bisongni sambao ong·ani gimin nie dongna nangaia ine aganaha. Indake salgipino Rongsanggre songo ro·ong bikotako nina re·angaha, uni joljol nie apsan salon Wadagokgre-oniko nina re·angmitingon, ramao rong·terangko nikangaha, indake re·bapilmitingode ro·ongrangko bang·en nikaha. Rama jolgimikon mandekoba nike, ro·ongrangko salprete kataha. Unosa ruachi den·rike Dilseng M. Sangma janggi gimana nangaha,” ine ACHIK Organisation-ni IT Secretary Jhony Marak aganaha.

“Sianggipa Dilseng M. Sangma-ni nokdangna a·dok sorkari gong lak 50-ko gamna nanga aro GHADC-ba gong lak 50-ko gamna nanga. A·selo jak donggipa gimikon rim·na nanga aro namgijako dakna ge·etgipa gimikon February jani gisepon rim·na nanga. Dongrikenggipa nokdangni manderangna naljokaniko on·na nanga. Unbaksana sianggipa nokdangni mandena janggi tangani cholko sorkari on·na nanga,” ine AAYF-ni President Salsam R. Marak dabiangaha.

“Sixth Schedule-o A·chikrangna on·gimin niam bidiko pangchake, gipin jatrangni skatang bading chiwalaniko, songdong a·chaaniko aro buring bolgrimrangko nosto ka·anirangko champengna nanga,” ine AIGU-Garo Hills Region-ni President Lening Great K.Sangma didiangskaha.

“Mikkangchi apsan re·mikkangna pilak NGO-rangni dilgiparang dingtangmancha bimang ge·sako bikote re·mikkangna namniktokaha,” ine ADIL-ni President Francis C.Marak aganaha.

“Tura anti bajarrango A·chik ma·giparang jerangan me·su samjakrangko bading chiwale ba pale sim·e cha·engachim, uamangko skatang kragija kattarangchi aganjajachina,” DINDAM-ni Vice President didiangaha.

“A·chik depante saksa janggiko gimaatna nanganiara namen rasong gribeani ong·aha, mikkangchi iandake a·sel ong·aniko champengna ta·raken ja·ku ga·na nangengaha,” ine NTDF-ni President David Marak aganskaha.

“Tura jolo bang·en simsakbataniko dakna nangenga aro man·a dipet gipin biaponi re·bagiparangna bading chiwalaniko on·na nangja” ine GRPCC-ni member Ajay Marak aganaha.

Ia tom·anio GSMC, ACHIK, GES, ASPF, GOERA, ADIL, AAYF, DINDAM, AOSW, AIGU, AAYWS, ASWA, CSAWO, Chokpot-ni nangrimgimin NGO-rang GGU, Senior Citizen, NTDF aro gipinrang bak ra·angtokaha.

Unbaksana tom·e chanchirimanio, Sixth Schedule-ko chel·chakna A·chik a·song gimik mikkrake re·mikkangna Nokmarang, Lasker-rang, GHADC aro Pressure Group-rang raken ja·ku ga·na gitaba tik ka·angaha.

Uandake re·baenggipa February-ni 13 tariko A·chik a·song gimik dal·begipa tom·bimonganiko ong·atna gitaba NGO-rang tik ka·angaha.