By:www.ghdnews.in

New Delhi, March 19, 2026: Niamgri Garo Hills-ona Bangladesh a·songni aro gipin biaprangoni napsrukbaenba Tribal-rangko, mongsongbate A·chikrangko chadrapna jotton ka·enga aro manderangni a·a-chi aro gam-jinrangko ra·sekan baksa nosto ka·na jotton ka·enga ine Budbar salo, Tura-ni MP Saleng A Sangma, Garo Hills-o songdongenggipa Tribal manderangko chel·chakchina ma·mong sorkariko didiataha.

Garo Hills-o ong·enggipa obostani bidingo, Union Home Minister Amit Saha-na sedoatenba, Tura Lok Sabha elakkao songdongenggipa Tribal manderangni janggirangko aro gam-jinrangko chel·chakna gita ta·raken ja·kuko de·china Tura-ni MP didiataha.

Uandake, a·song damgnini sima arirango so·sojengjeng ong·anirang namjabatengani gimin, India a·songni Prime Minister Narendra Modi-ni dilenggipa Cabinet Security Committee, iani bidingo ta·raken ja·kuko de·na nangenga, ine Sangma parakataha.

West Garo Hills a·jani a·kawe jolrango donggipa Rajabala, Tikrikilla, Phulbari, Chibinang aro gipin biaprango, Tribal ong·gijagipa manderang, Tribal-rangni kosako ka·mikkenatna lekka pal·takrangko tapenga. ine janapatenba, ua manderang, Tribal-rangko ia bilsini gisepon Garo Hills-ko wate katchina ka·mikkenataha ine Tura MP parakataha.

Batanggipa salrango A·chik sakgniko so·otani bidingo aro A·chikrangni nokrangko so·chipe galani giminba, Sangma Union Home Minister-na sedoatgipa chittio janapataha.

“Re·anggipa March 9 tariko, Chibinang Bajar-o donggipa A·chikrangni dokkanrangko so·e galaha aro Ama Mariani mangkrongkoba pe·e galaha. Indakgipa a·selrang ong·ani bidingo Garo Hills-ni manderangko namen gisik saataha,” ine Sangma parakataha.

Pulisrangni kobor man·soani gitade, iandakgipa kamrangko gipin biaprangoni napsrukbagipa manderang ka·aha, ineba Sangma parakataha.

Iandakgipa kamrangni a·selan Garo Hills-o songdongenggipa Tribal manderangna namen kenchakani ong·enga. Uni gimin ma·mong sorkari nangani kri chel·chakgipa sipai dolrangko donatchina gitaba, Sangma Union Home Minister-ko didiataha.

Da·o GHADC eleksin-ko jadokna ra·dodapatani ja·man, Garo Hills-o ong·enggipa obostarangko namatna gita ta·raken ja·kuko de·na nangchongmotenga ineba Tura-ni MP parakataha.