Tura, Oct 5, 2024: Garo Hills gimikon mikkarang dondikgija jimbee waengani a·sel a·arang rua, chi bananio sak 10 manderangni janggirang gimaatako man·aha. Ia ong·telaigipa obostarangni a·sel bolni dollongrang man·pakangako man·aha aro nok jamrang nosto ong·atako man·aha aro Garo Hills-ni bang·a ramarango a·arang ru·dape champengatako man·aha.

Garo Hills-o chi bananichi nangchakeako man·gipa manderangna dakchakaniko on·na gita sorkarini dakchakaniko am·china, a·dokni Skotong Minister Conrad K Sangma, a·jani pilak District Administration-rangna ge·etaniko on·ataha.

Sonibar pringo, Skotong Minister chi bananichi nangchakeako man·batgipa South Garo Hills aro West Garo Hills a·jarangko man·chape dam 5 a·jarangona re·ange nirokeaniko dakangaha.

Sukrobar waloni dondikgija mikkarang waengani a·sel, West Garo Hills a·jani Dalu aro a·kawe jolrango chi bananirang aro South Garo Hills-ni Gasuapara jolrango bang·en nangchakeaniko man·aha. Jeon bolni dollongrangko chi man·pakangaha.
Sukrobar salo, West Garo Hills a·jao donggipa Dalu jolo sak 3 manderang janggitangko gimaataha.

Apsandaken, South Garo Hills a·jani Gasuapara Pulis Station-ni ning·o ga·akgipa Hatiasia Songma songo a·a rudape, nokdang ge·sani sak 7 manderang siaha. Ia ong·telaigipa obostarangni a·sel janggirangko gimaata man·gipa manderangni nokdangna ex-gratia ba tangka paisa dakchakaniko on·china, Skotong Minister a·jani District Administration-rangna ge·etaniko on·angaha.

Uandake, a·a rudapa man·gipa nokdang ge·sani sak 7 manderangko NDRF dolrang, am·sandianiko dakenga aro duko ga·akenggipa manderangko naljokatna raken kamrangko ka·enga.

Garo Hills-ni bang·a biaprangon a·arang ruani a·sel, Dalu-oni Baghamara-ona re·gipa ramarang aro gipin biaprangona re·ruraenggipa ramarang champengatako man·tokahani gimin, Skotong Minister, champengatako man·enggipa Dalu, Baghmara ramarangko taripiltaichina aro gipin ramarangkoba am·sandichina District Administration-rangko didiataha.

Je bolni dollongrangko man·pakangahachim, uni palo Bailey Bridge Technology-ko jakkale ta·rake tarina man·gipa silni dollongko tarichina gitaba Skotong Minister didiataha.
Skotong Minister, pilak bolni dollongrangko sandiman·aha aro uarang gimikkon ra·galenba gital silni dollongrangko tariskagen ine parakataha.

Indake, Sonibar salni gisepo nosto ong·gipa bijolirangko sokatgen ine official saksa u·iataha. Skotong Minister, manderangni neng·nikaniko namatna aro chu·onga gita dakchakaniko sokatna jotton ka·china ge·etaniko on·angenba, District Administration-rang aro Official-rangko mikkrake dongchina gitaba ge·etaniko on·angaha.