@ghdnews.in@

Tura, Feb 20, 2026:: All India Congress Committee (AICC)-ni Observer Dr Bellaiah Naik Tejavath, Bristibar salo Garo Hills-ona sokbaenba, ua Bristibar salonin Garo Hills-ni dingtang dingtang District Congress Committee (DCC) aro Block Congress Committee (BCC)-ni dilgiparangko gronge agangrikna a·bachengaha.

Tura-ona sokbaani ja·man kobor ra·timgiparangna talatangengon, onbatgipa gadangonin Congress dolko mangrakpilattaina gita, BCC aro DCC-ni member sakanti baksa sakprakprak agangrike, uamangni nangnikani aro agan-ku·pattianirangko ra·na uko AICC, Garo Hills-ona watataha ine Dr Tejavath aganaha.

District level, block level aro primary level-o gital committee-rangko songna nangengani bidingo DCC-ni President-ko songna gita AICC, dorgastorangko on·enga aro Congress membor sakantian, on·gimin form-o gapate, dorgastoko galna man·gen ine Dr Tejavath aganaha.

Indake ong·engon, da·al Sukrobar salni 11 bajio, pilak DCC aro BCC-ni President General Secretary aro delegate-rangko Tura Congress Bhavan-ona re·bae, AICC-ni Observer Dr Tejavath-ko grongechina aro an·tangtangni gamchatgipa ku·pattianirangko on·atchina Congress dolni dilgiparang didiataha.