Nongpoh, April 13, 2026: Re·anggipa March 9 tariko Phulbari-ni gitcham MLA Esmatur Mominin, A·chik jatni dabianiko aro jegalaniko manigija ra·bie, GHADC eleksin-o susana an·tangni Nomination-ko file ka·na re·badraani a·sel, Garo Hills-o so·sojengjeng ong·ani ja·man, jasa mangna kate dongenba, kate chakna man·teljae, April 12 tarik Robibar salo, Nongpoh pulisrangna an·tangko bame on·eaha.

Re·anggipa March jao Garo Hills Autonomous District Council (GHADC) eleksin-na skang Garo Hills-o so·sojengjeng ong·aonin Esmatur Mominin, pulisrangoni kate dongengachim, indiba ua Robibar salo, Nongpoh pulisangona re·ange, an·tangko bame on·eaha.

Garo Hills-o so·sojengjeng ong·aniara, re·anggipa March 9 tariko, Esmatur Mominin-ni GHADC eleksin-o susana, nomination file ka·drana West Garo Hills a·jao donggipa Tura-ni Deputy Commissioner (DC) Office-ona manigija re·baani a·sel, Garo Hills-o so·sojengjeng ong·na a·bachengaha.

GHADC eleksin-o Tribal ong·gijagipa candidate-rangni bak ra·aniko NGO-rang, Civil Society Organization-rang, Garo Hills-ni Nokma Sordar-rang aro A·chik a·songni manderang pilakan jegale, champengaoaniko dakengon, Mominin manigija nomination file ka·drana re·bahani gimin, ua salo manderang ka·a chakna man·jae, uko jinma chadrapaha aro apsan salni attamon, ua Phulbari-ona re·angpile, A·chikrangni kosako ding·chaoatani kattarangko aganahani gimin, Chibinang, Chandigre jolrango A·chikrangni dokkanrang, GSU office aro nokrangko chadrape so·ahani a·sel, Tura-oba so·sojengjeng ong·na a·bachengaha.

Indake Garo Hills-ni dingtang dingtang biaprango so·sojengjeng ong·ahani gimin, April 10 tariko ong·atna tik ka·gipa, GHADC-ni eleksin-ko sorkari, dontongatna nangaha.

Pulisrangni u·iatani gitade, Garo Hills-o so·sojengjeng ong·na a·bachengaonin, Esmatur Mominin, pulisrangoni jokna kate chakaha.

Indake ong·genchimoba, Esmatur Mominin-ni kosako dingtang dingtang manderang badi ba FIR ka·ahani gimin, kate chakoba, pulisrangni jakoni jokteljawa, ine chanchienba, April 12 tarik Robibar salo an·tangko Nongpoh pulisna bame on·eaha.

Uni kosako sorkari mai ja·kurangko de·anggen, uko da·odipet parakatkuja. Uni (Mominin), Garo Hills-ko so·sojengjeng ong·atani a·sel, Tura-o donggipa NPP office aro Skotong Minister-ni boninggipa sakgnini chu dokkanrang aro dingtang dingtang dokkanrang nosto ka·ako man·aha aro bang·a bosturang, mal-gamrang gimaatako man·aha.

Esmatur Mominin-ni A·chik jatko chonnike, Sixth Schedule-ni niamko pe·e, GHADC elekain-o susana ra·badraani a·selsa Garo Hills-o so·sojengjeng a·bachengaha aro sorkarini mal-gamrang nosto ka·ako man·aha.