Tura, Oct 5, 2024: Bristibar walonin mikkarang dontonggija waengani a·sel Sukrobar pringo, Garo Hills-ni bang·a biaprangon a·arang be·anirangko, chi bananirangko aro rama jal·langrang nosto ong·atako man·aha.

Uandaken, Tura-ni Te·tengkol, Circuit House ramako re·angmitting somoio gari bolsako a·a be·dapha, indiba rasong gnangbee mandede janggi jokaha. Apsandake Tura-ni dingtang dingtang gittimrang aro ramarango a·arang be·dapaha aro chi bananirang Dalu, South West aro South Garo Hills jolrango bilongbate a·arang be·dapako man·e, sakgittam manderang siangna gita nangaha. A·a be·dapako man·e sianggipa manderangara, Dalu jolo donggipa Koinadubi songni bilsi 57 ong·gipa Santa N Marak, Sorokpara songni bilsi 5 ong·gipa Miando P Marak aro Karonggre songni bilsi 18 ong·gipa Sanira M Marak ong·achim ine koborna u·iataha.

Koborna u·iatani gitade, Sukrobar pringo mikkarang jimbee wamiting somoio Dalu jolo donggipa Koinadubi songni nok te·sa a·a be·dapako man·e, ua nokni ma·gipa janggi gimaatako man·aha aro uni demechik bilongbee saknaaniko man·aha. Apsan Sukrobar pringni bakon Sorokpara songoba nok te·sako a·a be·dapanio bilsi 5 ong·gipa me·a bi·sa sina gita nangaha. Uni ja·man Karonggre songoba nok te·sako a·a be·dapanio bilsi 18 ong·gipa me·chik saksaba janggitangko gimaatna nangaha.

Bristibar walonin mikkarang dondikgija waengahani a·sel, South Garo Hills a·jaona dakanggipa border ramaoba Dalu Chaipani jolo donggipa dollong ge·sako chi pe·angaha aro rama re·ruraaniko champengataha. Una agreba South Garo Hills a·jaona dakanggipa ramani bang·a biaprangon a·arang be·dapanichi rama jal·langrang nosto ong·e, ramarangko champengataha. Chokpot joloba Dareng chibima dal·bae, bang·a biaprangon chi bannaha.

Kobor man·soani gitade, Silkigre PHC aro Rongrikkimgre PHC-ba chi bananichi nosto ong·aha. Sukrobar pringo, bang·bata biaprangon manderangni nok-jam, bagan bari, rama jal·langrang aro manderangni gam-jinrangko a·a be·dape gimaataniko aro nosto ong·atako man·aha. Tura Hawakhana jolo donggipa mi dokkan ge·sako a·a be·dapanichi dokkanni manderang adita saknaako man·aha.

Apsan daken Tura-ni dingtang dingtang biaprangoba bang·en a·arang be·aha. South West Garo Hills a·jaoba, bang·en a·arang be·aha aro chirang bananirangko niksona gita man·aha. Koborni gitade, South West Garo Hills a·jani Rerapara, Okkapara aro Garobadha jolrango chi bananichi manderang neng·nikanirangko chagrongtokna nangaha. Apsan daken Mahendraganj jolrangoba chi bananirang aro a·arang be·anirangchi manderang noksan ong·atako man·aha, indiba da·o dipet badita kingking bano mai ong·aha namedake talna man·kujaenga ine official-rang parakataha.