Tura, May 1, 2025: Ranggira a·bri jolo donggipa Pagugre aro Soragre song gita Babadam-ona ga·bate re·gipa Garol Ranggol Wari-ko RCC dollong ka·bate on·pachina mol·mole, Edenbari jolni Social Activist Cyril A.Sangma aro gipin Social Activist-rang, Bristibar pringo Assembly-ni Speaker aro North Tura-ni MLA Thomas A.Sangma-ko gronge chitti sedoangaha.

West Garo HIlls a·jani Ranggira a·bri jolrango donggipa songrang Pagugre, Soragre, Dopananggre, Dorenggre aro Sinarugre songni manderang, wachini somoio Ganol chibimako dim·penggipa Ganol Hydro Project, Dam-oni gapsuake jokbagipa Ganol Ranggol Wari-ko ga·batna namen neng·nikani ong·enga ine Social Activist-rangni MLA-na seatgipa chittio janapataha.

Cyril Sangma-ni janapatani gitade, Ganol chibima nalsao songdongenggipa manderang, wachini somoio mikka wae chi dal·ani gimin, Ranggol Wari-ko kabatgipa Cross-way Cause-ko batsotna man·jani gimin, Ranggira a·bri jolo songdonggipa manderang namen neng·nikaniko man·tokenga.

Uni gimin, Ganol Ranggol Wari-ko ta·rake RCC dollong kabate on·pachina aro neng·nikaniko chagrongenggipa manderangna dakchakaniko on·pachina Social Activist mol·molataha.

Ranggol Wari-ko dollong rike on·na man·genchimode, salani re·ruraenggipa manderang maming neng·nikani aro kenchakani gri wachini somoio re·rurana man·genchim ineba Sangma parakataha.