Shillong, Oct 17, 2024: Gambegre by-eleksin-ko re·baenggipa November 13 tariko ong·atgen Eleksin Commission of India (ECI) parakataha.
ECI Gambegre by-eleksin-na gazetted notification-ko October 18 tariko ong·atgen aro nomination file ka·ani bon·kamgipa tarik October 25-o ong·gen ine parakataha.
Gambegre-ni gitcham MLA Saleng A.Sangma-ko ia bilsini Lok Sabha eleksino Tura-ni MP-na seokako man·ani ja·man, ua MLA-ko watna nangaha aro uni palo gital MLA-ko seokna gita by-eleksin-ko ong·atna nangaha.
A·songo by-eleksin-ko dam 15 a·dokni ge 48 Assembly constituency-rango aro dam 2 Parliamentary Constituency-rango ong·atna sienga.
Indake, Gambegre by-eleksin-ko tom·tome aro nama bewalo ong·atna Eleksin Department tarisoengaha ine a·dokni Chief Eleksin Officer (CEO) BDR Tiwari parakataha.
Gambegre by-eleksin-na nomination file ka·giminko October 28 tariko Scrutiny ka·agen aro nomination-rangko ra·galpilani bon·kamgipa salara October 30 tariko
ong·skagen.
Gambegre constituency-o sak 32,157 voter-rang gnang. Uarangoni sak 16,333 me·asarang aro sak 15,824-de me·chikrang ong·a.
Uandake, Gambegre constituency-ni ning·o dam 51 polling station-rang donga, uarangoni dam 31 polling station-rangde kenchakna nanggiparang ong·a ine CEO parakataha.
