Shillong, Oct 18,2024: Re·baenggipa November 13 tariko ong·atenggipa Gambegre By election-o BJP candidate-ko susaatgen, iani bidingo BJP October 21 tariko New Delhi-o tom·e chanchirimaniko dakenba candidate-ko parakatgen.
Gambegre by-election-o susana gita BJP tikitna dorgasto galgiparang adita sakrang donga ine Cabinet Minister aro BJP dilgipa AL Hek Bristibar salo kobor ra·timgiparangna aganaha. Indake parakatengon, joltangni BJP dilgiparang Gambegre By-Election-o party-tangni candidate-na campaign ka·anggen.
Meghalaya a·doko BJP dolko niksengatna man·kujaengani gimin namen bilgrienga aro re·anggipa Lok Sabha election-o gita dake BJP, candidate-ko chakatatgija NPP-na chaktaigen ine janggipa kattarangko AL Hek jechakaha aro candidate-tangko susaatgen ine parakataha.
“Chinga manderangko grongenba Prime Minister Narendra Modi-ni dingtang dingtang scheme-rangni bidingo ma·siate on·gen, jerangkon kangal-cholgri manderangna a·bachengatahachim” ine Hek aganaha.
Gambegre by-eleksin-o NPP, BJP, Congress aro TMC dolrang bilake susagrikgen.
Tura Lok Sabha election-o susae cheani ja·mano Saleng Sangma-ni MLA-ko watangani ja·man da·o Gambegre Assembly seat-na susagrikanggen.
Nomination file ka·aniko October 25-ona ra·chakgen aro November 13 tariko pu·ongen, November 23 tariko vote-rangko changen ineba Hek parakataha.
