Baghmara, Oct 11,2024: Re·anggipa October 4 tariko chi banako man·gipa, Ruga Rompa Chijol kosak jolo songdongenggipa manderang darangni dakchakaniko man·gija dongenggipa nokdangrangna, October 11 tarik Sukrobar salo dakchakaniko on·egipa A·chik A·song Environment Enthusiast Society (AAEES) dolko FKJGP Gasuapara Circle aro Ruga jolni manderang mittelpilskaaniko parakataha.

Re·anggipa antio mikkarang dondikgija waanichi chirang bane, nokjamrang nosto ong·ako man·e duko ga·akenggipa Ruga Rompa chijol kosak jolo songdongenggipa manderang watchanggalako man·engani gimin, FKJGP Gasuapara Circle-ni General Secretary Kalsrang Marak-ni mol·molatanina, AAEES dol baksa dingtang dingtang Club-rang bakrime, songni manderangna cha·a ringani, chola ba·ra aro pilak nokni nanga bosturangko Sukrobar salo ra·ange on·eaha.

AAEES dolara dingtang dingtang dolrangni bakrime bikotgimin dol ong·a, ua dolrangara Durama Motor Sports Adventure Club (DMAC), Royal Enfield Bikers Community of Garo Hills (REBCGH), Tribal Nation Riders (TNR), ITI Tura aro Baghmara Campers ong·a.

Uamangni namgipa aro jaksramgipa kamna FKJGP Gasuapara Circle, manderangni palo mittelpilskaaniko on·atan baksa mikangchi uamangni jat aro a·songna dangdike on·anirango aro dukko man·enggipa A·chik A·songni manderangna dakchake on·anirango, uamangna Nokgipa bang·bea pattianiko on·skachina, nama sikaniko on·ataha.