Baghmara, Oct 13, 2024: Re·anggipa October 4 tariko Garo Hills gimikon mikkarang dontonggija waani a·sel, South Garo Hills a·jani Gasuapara C&RD block-ni ning·o donggipa bang·a songrangan chi bananichi nok jamrang nosto ong·ako man·e duko ga·akenggipa nokdangrangna cha·ani ringani aro gipin dingtang dingtang nanga bosturangko FKJGP Garo Hills Zone-ni, gita FKJGP Gasuapara Circle-ona sokate on·aha.

Indiba ua bosturangko badia gittim ba songrangona sokate ba suale on·na nangbatengachim, uarangko sokate ba suale on·china FKJGP Gasuapara Circle, Gasuapara C&RD block-na pakwate on·atskaha ine FKJGP Gasuapara Circle-ni General Secretary Kalarang Marak u·iataha.