www.ghdnews.in

Tura, Feb 27, 2026: Meghalaya a·dokni State Reservation Policy (SRP)-ni bidingo gital dake nipiltaichina a·dok sorkarini songe on·gipa, Expert Committee (EC)-ni on·gipa Report-ko Assembly-o parakatani ja·man, iani bidingo MLA-rang, dingtang agangriktaina Opposition dolni dilgipa Dr. Mukul M. Sangma aro Voice of the Peoples’ Party (VPP)-ni Padot Ardent M. Basaiawmoit-ni Skotong Minister-ko didiahani gimin, A·chik Holistic Awakening Movement (AHAM) raken jegalataha.

Reservation Policy-ko gital dake nipiltaiani bidingo a·dokni dilgiparang, dingtang chanchirimtaina didianiko jegalatenba, “Skotong Minister-ni chamber-o an·tangtangari chanchirimtaina ku·monganiara niamni a·palo ong·a, maina sorkarini songe on·gipa Expert Committee-an, Meghalaya a·dokni dingtang dingtang biaprangona re·e, manderangni nangnikanirangko aro chanchianirangko ra·mane, report-ko tarimanaha,” ine AHAM parakataha.

Meghalaya a·doko songdongenggipa manderang, Civil Society Organization-rang, NGO-rang aro dingtang dingtang dilgiparang, Reservation Policy-ko skango gitan donaichina nangnike, Expert Committee-ni mikkango parakmanaha ine AHAM parakataha.

“Democracy-ode majority ba bang·batgipa manderangni chanchianiko aro nangnikaniko chu·sokatna nangaia. Manderang bang·batan an·tangtangni nangnikanirangko Expert Committee-na parakmanahani gimin, da·o iako dilgiparangni gisepo chanchirimtaina miksonganiara a·songni dongimin niamo manderangni namnikaniko pe·ani ong·enga,” ineba AHAM parakataha.

Garorangna kanggimin 40% percent-kode, komiatgija aro batatgija, Khasi-Jaintia-rangna, 47% percent-ko bariatchina VPP MLA Ardent Basaiawmoit-ni dabianiko jegalatskaenba, “Reservation Policy-kode bimang ge·sanosa chalaiani gimin, badiaba bakko batatgenchimoba, ia policy-ni bimang gimikkon nipiltaiaona sokangaigen. Uni gimin Garo-rangna chamgiminko dangtapgija Khasi-Jaintia-rangna bariatchina dabianiara ainni gita ong·jaenga,” ine AHAM parakataha.

Reservation Policy-ko baksakosan nipiltaianiara chu·gimik policy-kon nipiltaiaona ra·anggen ine janapatengon, indake ja·kuko de·anichi jatsa jatgipinni kosako ding·chaogrikani, dingtang dingtang jatrangni gisepo komibatnikani aro gital dake nipiltaichina dabianionan sokangtaigen ine AHAM parakataha.

“Manderang an·tangtangan reservation policy-ko taridapgija skango gitan donangkuchina Expert Committee-ni mikkango parakmanahani gimin dilgiparang an·tangtangari iani bidingo chanchirimtaina nangkuenga?” ine AHAM sing·doatenba, Expert Committee-ni ku·pattie on·ani ja·manba sorkari, ia policy-ko taridapna jotton ka·angkua ong·ode, niamko pe·a ga·akgen ine mikrakataniko on·ataha.