www.ghdnews.in

Shillong, Feb 25: A·dokni State Reservation Policy (SRP)-ko taridapgija skango gitan apsan donangkuchina, a·dok sorkarini songe on·gipa Expert Committee (EC)-ni report on·aniko Voice of the Peoples’ Party (VPP)-ni Padot Ardent Miller Basaiawmoit, raken jegalangaha aro iako ra·gatna skang apsan agangriktaichina a·dok sorkario dabiangaha.

February 16 tarikoni ong·atenggipa Meghalaya Assembly Budget Session-o State Reservation Policy-ni bidingo, Expert Committee-ni on·gipa report-ko jegalangani ja·man, kobor ra·timgiparangns baksa aganengon, Reservation Policy-ko maming taridapani gri skango gitan donchina Expert Committee-ni ku·pattianiko uamang ra·chakna man·jawa, ine Basaiawmoit aganaha.

Sorkarini songe on·gips, Expert Committee-ni agan ku·pattianiko ra·na skang a·dokni Skotong Minister, iani bidingo uamang baksa agangrikchenggenma ineba ua sing·doangaha.

A·dokni State Reservation Policy-ni bidingo ua, MLA-rang baksa agangrikna kusi ong·aigen ine a·dokni Skotong Minister Conrad K Sangma, Assembly-o aganahani gimin VPP-ni Padot iani bidingo Skotong Minister-ko gronge agangrikgen ine parakataha.

Expert Committee-ni Report-ko sorkarina on·aoni ja 8 ja·mansa parakahani giminba, Basaiawmoit, an·tangni suk ong·gijaniko parakangaha.

Salgro Salaramni bang·bata Tribal a·dokrangon 80% percent-na bate biaprangko a·kangani donga aro Meghalaya a·dokba, Tribal a·dokan ong·ani gimin, iako dakna man·aia ineba ua aganaha.

Tribal a·dokrangode gipin a·dokrang gita apsan niamko ja·rikatna man·jawa, ine Supreme Court-ni rai on·gipao pangchaken a·dok sorkari ja·kuko de·genchimode, uno ka·dongani dongkuenga ine VPP Padot aganaha.

State Reservation Policy-ko Khasi aro Jaintia-na 47% percent-ko VPP dabienga aro iakon dabiangkugen, ineba Basaiawmoit aganaha.