Baghmara, May 5, 2025: South Garo Hills a·jani Siju C&RD Block-ni ning·o donggipa Eman Gatabilgre Govt LP Skul nok namsrangjahani gimin poraienggipa bi·sarang aro skigiparang, neng·nikaniko chagrongna nangenga.

Nokkingni tinrang napongahani gimin wachini somoio mikka selani a·sel skul ka·na man·jae bi·sarang bilsianti jadakni porikkarangko sena man·rongja. Indita bilsirangna ia skul nokko tarigija donani a·sel nokkingni tinrang napongaha aro kelkirang nosto ong·aha ine songni budepa saksa parakataha.

Budepa saksani parakatani gitade, Eman Gatabilgre Govt. LP Skulko 1967 bilsion kuliaha aro ua bilsionin ia 2025 bilsiona kingkingba, sorkarini maming dakchakanirangko man·kuja.

“Ia skul nokan, ching songni polling station-ba ong·a. Chinga batanggipa somoirango MP, MLA aro MDC election-rangoba ia skul nokon vote-rangko pu·onenga. Indiba, dal·alona kingkingba sorkari aro education department, maming nirok simsaka dongja, galchipe donenga. Uni gimin, bi·sarangni namgnina ta·rakale ia skul nokko tarie on·pachina, Education Minister aro chingni MLA Rakkam A.Sangma-ko mol·molatpaenga” ine songni budepa saksa parakataha.

Meghalaya a·doko poraiani gadangko tang·doatna aro skulrangko namdapatna, a·dok sorkari skanggipa mikkango done kamko ka·enga ine Skotong Minister-ni agangimin kattarang dongachim. Indiba, da·alona kingkingba Eman Gatabilgre Govt. LP skulkode changsaba nirokata dongkuja, ine budepa saksa suk ong·gijaniko parakataha.