Chokpot, June 10,2025: South Garo Hills a·jani Chokpot Civil Sub Division-ni ning·o donggipa, Eman A·sakgre-ona dakanggipa rama namjani a·sel, songni manderang ma·gipa saksako hospital-ona ja·achi chile ra·anganiko nikna gita man·enga.
Eman A·sakgre song, ian South Garo Hills a·jani Chokpot jolo damsa ong·telaigipa biaprang dongani gimin namen mingsing minggamako man·achim, indiba rama namjani a·sel jolni manderang salanti re·a doanio namen neng·nikaniko man·tokenga, ine songni manderang parakataha.
“Ia ramako MLA aro MDC-rang darangba nirokata dongja, ine janapatenba, rama namode, da·alo chinga sagipa manderangko ja·achi chile ra·bana nangjawachim. Sagiparangko ta·raken garirango ra·angpana man·genchim. Da·o gita sagipa manderangko kacharango chel·begipa biaprangoni hospital-ona ja·achi chile ra·na nangjawachim. Chinga. ia amako tarie on·pachina dilgiparangko mol·molpaoba, darangan gisiko nangja aro knachakja” ine songni manderang suk obg·gijaniko parakataha.
Eman A·sakgre songni ma·gipa saksa bilongbee saani gimin, re·na dona man·gijako kachaosa chile ra·bana nangenga, ine songni manderang parakataha.
Iandakgipa obostarangko songni manderang chagrongna nangengani gimin, GSU Chokpot Regional Unit-ba suk ong·gijaniko parakatpaaha.
Uni gimin, ia ramako a·dokni Skotong Minister aro Chokpot-ni MLA, manderangni namgnina ta·rake, nirokatpachina GSU Chokpot Regional Unit, didiatenba, Meghalaya a·dokko man·chengaoni da·o bilsi 50 batangpilahaoba, Chokpot jolo maming dingtanganiko nikna man·kuja, ine GSU Chokpot Regional Unit, parakataha.
A·dok sorkari Chokpot jolo ong·enggipa obostarangko ta·raken nirokatpachina, GSU Chokpot Regional Unit, Skotong Minister-ko mol·molataha.
